जर्मन विद्यार्थीको सहयोगमा बन्यो विद्यालय भवन

काभ्रेपलाञ्चोक/  जर्मनीका विद्यार्थीको आर्थिक सहयोगमा रोशी गाउँपालिका-३ स्थित साझाकोटमा विद्यालय भवन निर्माण गरिएको छ । भीमसेन प्राथमिक विद्यालयको नवनिर्मित एकतले तीनकोठे पक्की भवनको गाउँपालिका अध्यक्ष दिनेश लामा र जर्मनीस्थित हिमालयन परियोजनाका प्रमुख माइकल हुसेनले संयुक्त रूपमा उद्‌घाटन गर्नुभयो ।

जर्मनीको ओच्सेहौसेन ग्याम्नासुम हाइस्कुलका करिब सात सय विद्यार्थीबाट उपलब्ध ३१ लाख ७७ हजार तीन सय रुपैयाँको सहयोगले उक्त भवन निर्माण भएको हो ।

विद्यार्थीले प्राचार्य इल्की रेमार्फत हिमालयन परियोजनामा दिइएको उक्त रकमले विद्यालय भवन निर्माण गर्न सकिएको हुसेनले बताउनुभयो । विद्यालय भवन निर्माणका लागि हिमाली गाउँ संरक्षण नेपालले परियोजनासँग समन्वय गरेको थियो ।

स्थानीय टङ्कबहादुर राउत र दमाइसिं तामाङले दान गर्नुभएको जग्गामा भवन निर्माण भएको विद्यालयका प्रधानाध्यापक मनिका राउतले जानकारी दिनुभयो । उक्त परियोजनाले विद्यालयलाई एक थान ल्यापटप कम्प्युटर पनि सहयोग गरेको छ ।

उक्त अवसरमा अध्यक्ष लामाले नवनिर्मित भवन निर्माणसँगै विद्यालयमा अध्ययनरत विद्यार्थीलाई सुरक्षित, व्यवस्थित तथा प्रविधिमैत्री वातावरणमा अध्ययन-अध्यापन गर्ने अवसर प्राप्त भएकामा खुसी व्यक्त गर्दै शिक्षा क्षेत्रको विकासलाई गाउँपालिकाले उच्च प्राथमिकता दिएको र विद्यालयलाई आवश्यक सहयोग निरन्तर रहने प्रतिबद्धता व्यक्त गर्नुभयो ।

कार्यक्रममा गाउँपालिका उपाध्यक्ष मिमबहादुर लामा, वडा नं. ५ का अध्यक्ष निरध्वज लामा, वडा नं. ३ का अध्यक्ष धनजित लामा, स्थानीय समाजसेवी टुल्कु लामालगायतले विद्यालयमा थप शैक्षिक गुणस्तरका लागि शुभकामना व्यक्त गर्नुभएको थियो । सो अवसरमा जग्गादाता राउत र तामाङलाई सम्मान गरिएको थियो ।

–रासस