रोचक घिमिरेको नेतृत्वमा विकल साहित्य प्रतिष्ठानको नयाँ कार्य समिति

आफ्नै खबर

१३ मंसिर २०८२ शनिबार (१ दिन अघि)

पाठक संख्या २४

काठमाडौँ / मङ्सिर १३ गते,

रमेश विकल साहित्य प्रतिष्ठानको १९औँ साधारण सभा सम्पन्न भएको छ । साहित्य सदन नेपाल, रामहिटी, काठमाडौँमा सम्पन्न सभाले रोचक घिमिरेको अध्यक्षतामा नयाँ कार्यसमिति निर्विरोध चयन गरेको छ ।

प्रतिष्ठानका अध्यक्ष रोचक घिमिरेको सभापतित्वमा सम्पन्न साधारणसभामा वार्षिक प्रतिवेदन तथा आर्थिक प्रतिवेदन सर्वसम्मले पारित गर्नुका साथै नयाँ कार्यसमिति चयन गरेको हो ।

सभाले अध्यक्षका तर्फबाट रोचका घिमिरेको वार्षिक प्रतिवेदन सचिव वसन्त रिजालले प्रस्तुत गर्नुभएको थियो भने कोषाध्यक्ष शाम्भकुमार चालिसेले आर्थिक वर्ष २०८०।०८१ को आर्थिक प्रतिवेदन पेश गर्नुभएको थियो ।

यस वर्ष प्रतिष्ठानका संस्थापक महासचिव तथा विकलका ज्येष्ठ सुपुत्र साहित्यकार एवं पत्रकार विजय चालिसेको निधनका कारण यसअघिको जस्तो विकल वाङ्मय पुरस्कार लगायतका उत्सवको आयोजना नगरी साधारण सभामा सीमित राखिएको थियो।

साधारणसभाबाट नयाँ कार्यसमिति चयनका लागि शिक्षा सेवी ईश्वरी प्रसाद लामिछानेको संयोजकत्वमा निर्वाचन समिति गठन गरिएको थियो । समितिका अन्य सदस्यमा पत्रकार यादब देवकोटा र प्राध्यापक शोभा बराल रहनुभएको थियो।

समितिले वरिष्ठ साहित्यिक पत्रकार रोचक घिमिरेको अध्यक्षतामा नयाँ कार्यसमितिको निर्विरोध निर्वाचित भएको घोषणा गरेको थियो ।

नवनिर्वाचित कार्यसमितिको उपाध्यक्षद्वयमा वरिष्ठ कलाकार के.के. कर्माचार्य तथा साहित्यकार हेमनाथ पौडेल, महासचिवमा वसन्त रिजाल, सचिवमा आलोक चालिसे रहनु भएको छ।

यसै गरी कोषाध्यक्षमा शाम्भकुमार चालिसे तथा सदस्यहरूमा मातृका पोखरेल, रामप्रसाद पौडेल, महेन्द्रकुमार चालिसे, सागरराज सुवेदी र मुना रुपाखेती रहनु भएको छ।

२०६३ सालमा रमेश विकल साहित्य प्रतिष्ठानको स्थापना भएसंगै विकलको जीवनकालमै वहाँले उपभोग गर्दै आउनुभएको ५ आना जमिनमा बनेको साढे २ तले भवन प्रतिष्ठानको स्वामित्वमा हस्तान्तरण गर्नुभएको थियो।

यस प्रतिष्ठानले साहित्यिक उन्नयन र विकलका बारेमा शोध गर्ने वातावरण तयार पार्दै उदाहरणीय सङ्ग्रहालयको विकास गरिरहेको छ।