बागमती नगर सुविधा बस्तीको कारुणिक अवस्था 

आफ्नै खबर

२३ भदौ २०८१ आईतबार (३ महिना अघि)

पाठक संख्या २२१

बागमती नगर सुविधा बस्ती (अधिकार सम्पन्न वागमती सभ्यता एकीकृत विकास समिति)को यो कारुणिक अवस्था देख्दा पटक्कै चित्त बुझेन । 

बौद्धमा केही समय बिताउनु पर्ने भएकोले बिहान-बिहान बागमती करिडोर हुँदै गुहेश्वरी सयर गर्ने मनसुवा उठ्यो। अरुणिमा कलेजबाट बागमती किनार नपुग्दै फराकिलो उद्यानले ध्यान खिच्यो ।

'बागमतीनगर सुविधा बस्ती" लेखिएको थियो साइनबोर्डमा !  काठमाडौँ महानगर - ६ गुहृयेश्वरीमा रहेको यस बागमती नगर उद्यान जापान प्रवासमा देखेको जस्तै फराकिलो मैदान,  प्याराफिट, वाटर फाउन्टेनको लागि छोडिएका जस्तो देखिने धाराको टुटीहरु, एउटा रुख नीम होला सायद - त्यसमा ठूलो चौतारो,  बस्ती विकासको बीचमा भएर होला अग्लो जालीले घेरिएको फुट्बल खेल मैदान, आडैमा भलिबल - बास्केट बलको कोर्ट, वरिपरि घुम्दा अन्दाजी ४-५ सय मिटरको वाकिङ ट्रेल जस्ता निकै आकर्षक पूर्वाधारहरु थिए । 

छानो भएको ८-१० ओपन कोठा पनि थियो । सनातिना प्रदर्शनी या खुल्ला ब्यापार मेलाका लागि उपयुक्त देखिन्थे । शौचालयको प्रबन्ध पनि सुरुवाती चराणमा राम्रो, व्यवस्थित रहेछ । तर दुर्भाग्य, लक्जरियस कमोट - बेसिन हालिएको शौचालय अहिले भताभुङ्ग देखिन्थे, टुटफुट मात्र हैन तोडफोडनै गरिएको हालतमा थिए । 

कुरुवा कक्षाको लागि बनाइका जस्ता देखिने कोठाहरु घरवार बिहिनका लागी आश्रय स्थल बनेको छ । उद्देश्यमूलक उपयोगिता नभए पनि उपयोगमा त आएको रहेछ, १ मनले सकारात्मक बिन्दु पहिल्यायो । अर्को मनले भन्यो , "माल पाएर चाल नपाउने" प्रवृत्ति र बिडम्बना कठै लाग्दो छैन त ?

नगर अथवा वडा स्तरिय बजेटबाट युवा क्लब, खेलकुद डोजो, कार्यकर्ता प्रोत्साहन कार्यक्रमका लागि थुप्रै आर्थिक अनुदान खर्चिने सरकार अथवा स्थानीय निकायले तिनैलाई ब्यवस्थापन जिम्मा दिएको भए कति सुन्दर हुन्थ्यो होला ? लाखौं (शायद करोडौँ ) खर्च भएर बनेको यो संरचना ! 

आफ्नै खबरका एक पाठक