गलेश्वरको गजुरमा सुनको जलप

आफ्नै खबर

४ मंसिर २०८२ बिहिबार (५ दिन अघि)

पाठक संख्या १८२

म्याग्दी/  दाताको सहयोगमा म्याग्दीको बेनी नगरपालिका-९ मा रहेको गलेश्वर मन्दिरको गजुरमा सुनको जलप र छानामा सुनौलो रङ लगाइएको छ । गलेश्वर निवासी बमबहादुर पुनले चार लाख रुपैयाँ खर्चेर मन्दिरको छानोमा गोल्डेन कलर (सुनौलो) रङ र गजुरमा सुनको जलप लगाउनुभएको हो । 

गलेश्वर मन्दिर विकास कोषका अध्यक्ष माधवप्रसाद रेग्मीका अनुसार कोषको निर्णय र स्वीकृति लिएर पुनले रङरोगन र जलप लगाउनुभएको हो । कोषका उपाध्यक्षसमेत रहनुभएका उहाँले यसअघि व्यक्तिगत लगानीमा गलेश्वर मन्दिरमा रहेको शिवजीको ज्योतिर्लिङ्गमा चाँदीको मुकुटले छोप्नुभएको थियो । 

जलप लगाउन प्रयोग भएको सात ग्राम सुन खरिदमा एक लाख ५१ हजार रुपैयाँ, २७ लिटर सुनौलो रङ खरिद, ढुवानी र ज्यालामा दुई लाख ३६ हजार रुपैयाँ खर्च भएको पुनले जानकारी दिनुभयो । गलेश्वर मन्दिरको छानो पित्तल र गजुर तामाको छ ।

यसअघि २०७७ सालमा कोषको २७ लाख रुपैयाँ आन्तरिक आम्दानीबाट र सहयोगदाता रमेश शर्माको पाँच लाख ५५ हजार पाँच सय ५५ रुपैयाँमा मन्दिरको छानोलाई पित्तलले छाइएको थियो । शर्माका बुवा राधाकृष्ण पराजुलीले २०५५ सालमा २० लाख रुपैयाँ खर्चेर गलेश्वर मन्दिर निर्माण गर्नुभएको थियो । 

रङरोगन र सुनौलो जलप लगाएपछि गलेश्वर मन्दिर चम्किलो र आकर्षक देखिएको छ । हिन्दू तथा बौद्ध धर्मावलम्बीको साझा तीर्थस्थल मुक्तिनाथ प्रवेशद्वारका रूपमा परिचित गलेश्वर म्याग्दीको प्रमुख धार्मिकस्थल हो । 

कालीगण्डकी नदी किनारमा नौ रोपनी क्षेत्रफलमा फैलिएको एउटै चट्टानमाथि अवस्थित गलेश्वर मन्दिरमा शिवालय मन्दिर छ । हिन्दु धर्मग्रन्थमा गलेश्वरमा सतीदेवीको गला पतन भएर उत्पत्ति भएको उल्लेख छ । साउन महिनाको सोमबार, बालाचतुर्दशी र महाशिवरात्रि पर्वमा यहाँ मेला लाग्ने गर्दछ भने दैनिक नित्य पूजाआजा हुन्छ ।

यस मन्दिरमा पूजाआजा र दर्शन गरेमा मनोकाङ्क्षा पूरा हुने विश्वास रहिआएको कोषका अध्यक्ष रेग्मीले बताउनुभयो । उहाँका अनुसार यस मन्दिरमा दाताले चढाउने भेटी र दाताको सहयोगबाट सङ्कलित रकम पूर्वाधार निर्माण, स्थानीय विकास र सामाजिक क्षेत्रमा परिचालन गरिँदै आइएको छ । 

यस वर्ष बेनी नगरपालिकासँगको साझेदारीमा गलेश्वर बजार सौन्दर्यकरण योजना सञ्चालन र गलेश्वर मन्दिर परिसरमा उज्यालोका लागि १८ मिटर अग्लो तीन हजार दुई सय वाट क्षमताको ‘हाइमाक्स लाइट’ जडान गर्न लागिएको कोषका सदस्य सचिव सम्मरबहादुर थापाले जानकारी दिनुभयो ।

उहाँका अनुसार गलेश्वर बजार क्षेत्रलाई धार्मिक तथा सङ्गीतमय बनाउन सात ठाउँमा ‘स्पीकर’ जडान गर्ने तयारी भइरहेको छ ।

–रासस