कुखुरा पालेरै महिनाको लाख आम्दानी

आफ्नै खबर

    (२ हप्ता अघि)

पाठक संख्या १९५

तनहुँ/  व्यास नगरपालिका-१ रतौलीका अर्जुनबहादुर बस्नेत विदेशबाट फर्किएपछि यतिबेला स्वदेशमा व्यावसायिक कुखुरापालनमा रमाउनु भएको छ । दुबईमा १७ वर्षसम्म जागिर गरी स्वदेश फर्किएर उहाँले कुखुरापालनबाट विदेशमा भन्दा राम्रो कमाइ गर्दै आउनुभएको हो । 

कुखुराको अण्डा बिक्री गरेर मासिक एक लाख रुपैयाँ आम्दानी लिँदै आएको उहाँले बताउनुभयो । विदेशमा रहँदा कोरोनाका समयमा बुवाको निधन भएको नौ महिनापछि घर फर्किनु भएका बस्नेतले पाँच वर्षअघि यो व्यवसाय सुरु गर्नुभएको थियो । उहाँले विदेशमा पाएको आम्दानीभन्दा स्वदेशमा बसेर दोब्बर कमाइ गर्न सकिन्छ भन्ने उदाहरणसमेत प्रस्तुत गर्न सफल हुनुभएको छ ।

उहाँले सञ्चालन गर्दै आउनुभएको ‘बस्नेत ब्रोइलर पोल्ट्री एण्ड एग फार्म’ मा हाल दुई हजार लेयर्स कुखुरा छन् । सुरुमा ३० लाख रुपैयाँ लगानीमा ६ रोपनीमा दुई आधुनिक ट्रष्ट निर्माण गरी व्यावसायिक रूपमा कुखुरापालन व्यवसाय सुरु गर्नुभएका बस्नेतले राम्रो आम्दानी गर्दै आउनुभएको छ ।  

दैनिक एक हजार आठ सय अण्डा उत्पादन हुने यो फार्मबाट महिनामा पाँच लाख रुपैयाँभन्दा बढीको कारोबार हुने गरेको छ । दाना, औषधि तथा श्रम खर्च कटाएर एक लाख रुपैयाँभन्दा आम्दानी हात पर्न थालेको बस्नेतले बताउनुभयो ।

उहाँले भन्नुभयो, ‘दुबईमा महिनामा ६० हजार रुपैयाँ आउँथ्यो, अहिले गाउँमै परिवारको साथमा बसेर विदेशको भन्दा दोब्बर फाइदा भइरहेको छ ।’ 

कुखुरा व्यवसायबाट उत्पादन हुने ठूलो अण्डा एक क्रेटको स्थानीय बजारमा प्रतिक्रेट पाँच सय रुपैयाँमा बिक्री हुँदै आएका छन् । जोखिमयुक्त मानिने कुखुरापालनमा किसानलाई टिकाइराख्न सरकारले दाना उत्पादनमा प्रत्यक्ष अनुदान दिनुपर्नेमा बस्नेतको जोड छ ।

उहाँले भन्नुभयो, ‘पूर्वाधारमा मात्र अनुदान दिएर काम हुँदैन । दानामा सहयोग भयो भने किसान टिकाउ हुन्छन्, राज्यको लगानी पनि सुरक्षित हुन्छ ।’ 

श्रीमती मधुमाया बस्नेतको निरन्तर साथमा फार्म चलाउनुभएका अर्जुन भन्नुहुन्छ, ‘कुखुराको मल प्रयोग गरेदेखि तोरी पनि राम्रो फलेको कारण तेल किन्नु परेको छैन । तरकारी पनि बजारबाट ल्याउनुपरेको छैन ।’

व्यास नगरपालिकाले इनार निर्माणका लागि २५ हजार रुपैयाँ र कुखुरा खरिदका लागि ५० हजार रुपैयाँ गरी ७५ हजार सहयोग गरेको व्यास-१ का वडासदस्य मणिजंग बस्नेतले बताउनुभयो । 

चितवनबाट चल्ला ल्याएर सुरु गरिएको यो व्यवसाय अहिले गाउँमै रोजगारी, आम्दानी र आत्मनिर्भरता अभिवृद्धिको उदाहरण बन्ने गरेको छ । विदेशमै भविष्य खोज्नुपर्ने बाध्यता हटाउँदै गाउँमै बसेर स्थिर आम्दानी गर्न सकिन्छ भन्ने प्रेरणादायी सन्देश बस्नेतको सफलताले दिएको कार्कीले बताउनुभयो ।

–रासस