एउटा सानो गाउँबाटै बिक्यो दुई करोडको सुन्तला

आफ्नै खबर

    (१७ घण्टा अघि)

पाठक संख्या ६८

म्याग्दी/  अन्नपूर्ण गाउँपालिका-७ दोसल्लेका किसानले यस वर्ष करिब दुई करोड रुपैयाँ बराबरको सुन्तला बिक्री गरेका छन् ।

४२ घरधुरीको बसोबास रहेको दोसल्ले गाउँमा गतवर्ष सुन्तलाबाट एक करोड ८० लाख रुपैयाँ भित्रिएको थियो । यसपालि दाना कम लागेपनि मूल्य बढेको र नयाँ बिरुवामा दाना लागेकाले समग्रमा गत वर्षकै अनुपातमा आम्दानी भएको दोसल्ले व्यवसायिक सुन्तलाजात किसान समूहका अध्यक्ष प्रेम पाइजाले जानकारी दिनुभयो ।

‘गत वर्षको तुलनामा यसपालि बोटमा २५ प्रतिशत कम दाना लागेको छ’, उहाँले भन्नुभयो, ‘बढी मूल्यमा सुन्तला बिक्री भएकाले गत गत वर्षकै हाराहारीमा आम्दानी भएको छ ।’ बढी मूल्य पार्नका लागि माघ महिना लागेपछि सुन्तला टिपेर बजार पठाउन थालेका थिए । 

दोसल्लेको बगैँचाको ६० प्रतिशत सुन्तला बजार पुगिसकेको छ । अझै ४० प्रतिशत सुन्तला बोटमै छ । किसान र व्यापारीहरूलाई सुन्तला टिपेर, ग्रेडीङ गर्ने र बजार पठाउने चटारो छ । देशका धेरै ठाउँका बगैँचा रित्तिएपछि याम सकिने समयमा सुन्तला टिप्न थालेका दोसल्लेका किसानले विगतको तुलनामा राम्रो मूल्य पाएका अगुवा किसान खगबिर पाइजाले बताउनुभयो ।

‘यसअघिका बर्षमा मंसिर-पुष महिनामा सुन्तला बिक्री गर्दा २० किलोको प्रतिक्रेट एक हजार सात सय रुपैयाँ मा बिक्री हुने गरेको थियो’, उहाँले भन्नुभयो, ‘यसपाली प्रतिक्रेट दुई हजार पाँच सय रुपैयाँमा बिक्री भइरहेको छ ।’ 

अन्यत्रको सुन्तला सकिएकाले ब्यापारिले प्रतिक्रेट तीन हजार दुई सय रुपैयाँसम्म मूल्य तिर्न तयार भएका अर्का किसान विकास श्रेष्ठले बताउनुभयो । पोखरा र काठमाडौंका व्यवसायी बगैँचामै पुगेर सुन्तला खरिद गरेपछि अहिले धमाधम सुन्तला टिप्ने काम भइरहेको छ । 

दोसल्लेका सबै घरले सुन्तला खेती गरेका छन् । गाउँबाट बसाइँसराइ रोकिएको छ । पहिले बेनी, पोखरालगायतका ठाउँमा बसाइँसराइ गरेकालेसमेत गाउँमा फर्किएर बाँझिएको जग्गामा सुन्तला रोपण गरेका छन् ।

दोसल्लेमा १० हजार सुन्तलाका बोट छन् । २०६८ सालमा पोखराबाट माटो परीक्षण विभागबाट विज्ञ ल्याएर माटो परीक्षण गरी सुन्तला खेतीमा लागेका दोसल्लेवासीले हरेक वर्ष सुन्तला खेतीलाई विस्तार गर्दै लगेका छन् ।

–रासस