विकासको अर्को उदाहरण : घोडेपानीको सडक लक्ष्यअघि नै स्तरोन्नति

आफ्नै खबर

    (११ घण्टा अघि)

पाठक संख्या ७८

म्याग्दी/  अन्नपूर्ण गाउँपालिकाको केन्द्र पोखरेबगरदेखि पर्यटकीयस्थल घोडेपानी जोड्ने सडक स्तरोन्नतिका लागि सञ्चालित योजना लक्ष्यभन्दा दुई महिनाअघि नै सम्पन्न भएको छ ।

अन्नपूर्ण गाउँपालिकाले चालु आर्थिक वर्षमा ५० लाख रुपैयाँ बजेट विनियोजन गरेको पोखरेबगर-घार-चित्रे सडक योजनामार्फत प्रतिस्पर्धामा छनोट भएको निर्माण कम्पनीले काम थालेको दुई महिनामै सम्पन्न गरेको हो ।

२०८२ चैत ३० गतेसम्म सम्पन्न गर्ने लक्ष्यसहित गत मङ्सिर २८ गते ३६ लाख १८ हजार रुपैयाँमा ठेक्का सम्झौता गरेको एसएस बिल्डर्स प्रालिले यसै हप्ता काम सम्पन्न गरेको अन्नपूर्ण गाउँपालिकाका प्रमुख प्रशासकीय अधिकृत कपिल पाण्डेले बताउनुभयो ।

घारको बिरौटा चोकदेखि भुन्या खण्डमा यसअघि सोलिङ भएको ठाउँमा तीन सय मिटर आरसिसी ढलान गरिएको उहाँले बताउनुभयो । अन्नपूर्ण गाउँपालिका-६ मा पर्ने पोखरेबगर र घोडेपानी जोड्ने यो सडक पोखरादेखि मुस्ताङ जोड्ने वैकल्पिक मार्ग पनि हो ।

अन्नपूर्ण गाउँपालिका-६ का वडाध्यक्ष रामबहादुर खड्काले सडक ढलान भएपछि स्थानीयवासीका साथै घोडेपानी-पुनहिल घुम्न आउने पर्यटकलाई सहज भएको बताउनुभयो । निर्माण व्यवसायीले पर्याप्त मजदुर, उपकरण परिचालन र निर्माण सामग्री व्यवस्थापन गरेर लक्ष्यभन्दा अगाडि नै सडक निर्माण गरेको वडाध्यक्ष खड्काले बताउनुभयो । 

पोखरेबगरदेखि घोडेपानी जोड्ने २१ किलोमिटर दूरीको यो सडक अन्नपूर्ण गाउँपालिका-५ र ६ का बासिन्दाका साथै घोडेपानी-पुनहिल घुम्न आउने पर्यटकहरूले प्रयोग गर्छन् । घोडेपानीदेखि कास्कीको उल्लेरी बिरेठाँटी हुँदै मध्यपहाडी लोकमार्गको नयाँपुलसम्म पनि सडकको मार्ग खुलेको छ । 

गण्डकी प्रदेश सरकारमार्फत पोखरेबगर-घोडेपानी सडकको चित्रे-घोडेपानी खण्डको तीन किलोमिटरमा फराकिलो पार्ने, नाली र टेवा पर्खाल बनाएर स्तरोन्नति गर्ने आयोजना सञ्चालन भएको छ ।

पोखरेबगर-बिरौटा खण्डको कुरमुनी र लुलिया घुम्तीको पहिरो प्रभावित क्षेत्रमा पहिरो रोकथाम र सडक स्तरोन्नति गर्न सङ्घीय सरकारले चालु आर्थिक वर्षमा तीन करोड रुपैयाँ विनियोजन गरेको थियो । 

स्थानीय पूर्वाधार आयोजना कास्कीअन्तर्गतको उक्त योजनाको बजेट सरकारले रोक्का गरेकाले कार्यान्वयन प्रक्रिया अघि नबढेको र पहल भइरहेको वडाध्यक्ष खड्काले बताउनुभयो । उक्त सडकको घोप्टेखर्कमा पहिरोका कारण साँघुरिएको सडकमा गाउँपालिकाले कुनातर्फ पर्खाल निर्माण गरेर फराकिलो पारि यातायात सञ्चालनको व्यवस्था मिलाएको छ । 

वार्षिक ३० हजार जनाको अनुपातमा विदेशी पर्यटकले भ्रमण गर्ने घोडेपानीमा सोभन्दा बढी आन्तरिक पर्यटक आउँछन् । पहाडको टाकुरामा अवस्थित घोडेपानी र नजिकैको पुनहिल सूर्योदय, हिमशृङ्खला, पहाडी भूगोल, गुराँसे जङ्गल, वन्यजन्तु, पन्छी, मगर संस्कृतिलगायत आकर्षण रहेको छ ।

–रासस