लगानी सम्मेलनमा प्रदेशका आयोजनाको छुट्टै स्टल

आफ्नै खबर

१६ चैत २०८० शुक्रबार (१ बर्ष अघि)

पाठक संख्या ९६

काठमाडौं/ आउँदो वैशाख १६ र १७ गते काठमाडौंमा आयोजना हुने तेस्रो लगानी सम्मेलनका क्रममा प्रदेशस्तरीय योजनाहरू पनि ‘सोकेस’मा राखिने भएको छ । प्रदेशका आयोजनाका लागि छुट्टै स्टल राखिने तयारी भएको हो । 

बिहीबार बसेको लगानी सम्मेलन निर्देशक समितिको बैठकमा अर्थमन्त्री एवं लगानी सम्मेलन निर्देशक समिति संयोजक वर्षमान पुनले प्रदेशका योजनामा पनि लगानी जुटाउनका लागि लगानी सोकेसमा राखिने जानकारी दिनुभयो । लगानी सम्मेलन निर्देशक समितिले बुधबार प्रदेश मुख्यमन्त्रीहरूसँग अन्तक्र्रिया गरेको थियो ।

त्यस क्रममा प्रदेश तहबाट हुने सहभागिता र सम्मेलनमा लगानीका लागि समावेश गर्न सकिने प्रादेशिकस्तरका आयोजनाको तयारीबारे छलफल भएको अर्थमन्त्री पुनको सचिवालयले जनाएको छ । हाल तयारी अवस्थामा रहेका वा नयाँ योजना छनोट गरी लगानी सम्मेलनमा समावेश गर्न निर्देशक समितिले प्रदेशहरूसँग आग्रह गरेको छ ।
जलविद्युत्, सूचना प्रविधि, कृषि, पर्यटन, उद्योगलगायत क्षेत्रमा वैदेशिक लगानी आकर्षित गर्न सकिने धारणा प्रदेशबाट आएको छ ।

त्यस्तै, निजी क्षेत्रका प्रतिनिधि संस्थाहरूले औँल्याएका विद्यमान केही कानुनमा संशोधन तथा विदेशी लगानीकर्तालाई मुनाफामा लैजान सकिने आधार तय गर्नुपर्ने सुझाव मुख्यमन्त्रीहरूबाट आएको थियो । निर्देशक समिति बैठकमा अर्थमन्त्री पुनले लगानी वातावरण सुधारका लागि आवश्यक कानुनमा परिमार्जनको प्रक्रिया अघि बढेको जानकारी दिनुभयो । उहाँले गैरआवासीय नेपालीलाई पनि लगानी सम्मेलनमा आउन आह्वान गरिएको बताउनुभयो । 

‘गैरआवासीय नेपालीलाई पनि लगानी सम्मेलनमा आमन्त्रण गरेका छौँ,’ अर्थमन्त्री पुनले भन्नुभयो, ‘परिस्थितिवश अरू देशको नागरिकता लिएको भए पनि उहाँहरू नेपाली नै हुनुहुन्छ । आफ्नो मातृभूमिमा आएर लगानी गर्न इच्छुक पनि हुनुभएको मैले पाएको छु ।’
                                                                                                                                                                                                                                 

                                                                                                                                                                                                                                                                                                                                                                                                                                                                     रासस