बागलुङको रिठेखोलामा पक्की पुल निर्माण

रासस

    (१ बर्ष अघि)

पाठक संख्या ४५

बागलुङ/  बागलुङ नगरपालिकाको वडा नम्बर ९ तित्याङ र वडा नम्बर १० भकुण्डेको सिमानामा बग्ने रिठेखोलामा पुल निर्माण भएपछि पुल अभावमा लामो समयदेखि अगम्य बनेको जिल्लाको पर्यटकीय गाउँ भकुण्डे पुग्न अब सहज भएको छ । संघीय सरकारको दुई करोड रुपैयाँ अनुदानमा रिठेखोलामा मोटर चल्ने पक्की पुल निर्माण भएपछि भकुण्डे पुग्न सजिलो भएको हो ।

यो पुल निर्माणले भकुण्डे हुँदै रायडाँडा पुग्न पनि सहज भएको छ । पुल बनेपछि सधैँभरि सवारीसाधन सञ्चालन गर्न सकिने बागलुङ नगरपालिकाले जनाएको छ । भकुण्डेमा जिल्लाकै पहिलो घरबास सञ्चालन भएको र विदेशी पर्यटकहरूका निम्ति आकर्षण बनेको स्थान हो । तर, त्यस क्षेत्रको पर्यटकीय सम्भावनालाई उजागर गर्दै पर्यटकीय गतिविधि बढाउन अन्य भौतिक पूर्वाधार पनि निर्माण गर्न जरुरी भएको संविधानसभा सदस्य नरबहादुर थापाले बताउनुभयो ।

उहाँले भकुण्डे पुग्ने बाटोमा पुल बने पनि सडक स्तरोन्नति गर्नुपर्नेमा जोड दिनुभयो । उहाँले भन्नुभयो, ‘अब नगरपालिकाको ध्यान सडक स्तरोन्नतिमा जानुपर्छ ।’
नवनिर्मित पुल २५.८ मिटर लामो छ भने यसको चौडाइ ६.६ मिटर छ । पुललाई बाढीपहिरोबाट जोगाउन धमाधम ‘ग्याबिन वाल’ लगाइँदै छ ।