कला र संस्कृतिको संरक्षण गर्न मेलम्चीमा खैजडी भजन प्रतियोगिता

आफ्नै खबर

११ बैशाख २०८१ मंगलबार (१ बर्ष अघि)

पाठक संख्या ६१

काठमाडाैं मेलम्ची नगरपालिकाले  कला संस्कृतिको संरक्षण गर्ने उद्देश्यले नगरस्तरीय खैजडी भजन प्रतियोगिता आयोजना गरेको छ । नगरपालिकाको आयोजना र जेष्ठ नागरिक सञ्जाल मेलम्ची नगरपालिकाको समन्वयमा भएको प्रतियोगितामा नगरका ८ वटा वडा सहभागी थिए।

प्रतियोगितामा वडा नम्बर १२ पहिलो,वडा नम्बर ८ दोस्रो र वडा नम्बर १० तेस्रो भयो । प्रतियोगितामा पहिलो दोस्रो र तेस्रो हुनेले क्रमश नगद १२ हजार,१० हजार र ८ हजार पुरस्कार प्राप्त गरे ।

कार्यक्रमलाई सम्बोधन गर्दै मेलम्ची नगरपालिकाका प्रमुख आइतमान तामाङले नगरपालिकाले जेष्ठ नागरिकहरुलाई सम्मान गर्दै कला र संस्कृतिको संरक्षणका लागि विभिन्न कार्यक्रम गरिरहेको स्मरण गर्नुभयो । ज्येष्ठ नागरिक हाम्रो समाजको गहना भएकाले उहाँहरुसँग भएका प्रतिभा तथा कलाहरुको संरक्षण गर्दै पुस्तान्तरणको खाँचो रहेको उहाँले औल्याउनुभयो । प्रमुख तामाङले आगामी दिनमा पनि हुने यस्ताखाले कार्यक्रममा सक्रिय सहभागिता जनाउन आग्रह गर्नुभयो ।

मौलिक कला र संस्कृतिको प्रचारप्रसार र संरक्षण जरुरी रहेको उपप्रमुख उमा प्रधानले बताउनुभयो । विशेषगरी हाम्रो समाजमा हरेका जेष्ठनागरिकहरु बहुप्रतिभाका खानी भएकाले दोस्रो पुस्ताले ती कार्यहरुको अनुसरण गर्नुपर्ने बताउनुभयो । नगरापलिका भित्रका सवै जातजातिका परम्परा, कला र सँस्कृतिलाई समान ढंगले सम्बोधन गर्दै अगाडि बढ्ने उपप्रमुख प्रधानले प्रतिबद्धता जनाउनुभयो । उहाँले सम्पुर्ण नगरबासीको त्याग संघर्ष र मेहनतबाट मात्र नगरको मुहार परिवर्तन हुन सक्ने बताउँदै नगरको विकासमा सवै नागरिकले सकरात्मक र रचनात्मक भुमिका खेल्नु पर्नेमा जोड दिनुभयो ।