रासायनिक मलको निर्भरता हटाउन स्वदेशी प्रयास

आफ्नै खबर

२० असार २०८१ बुधबार (५ महिना अघि)

पाठक संख्या ६१

काठमाडौं/  देशमा रासायनिक मल उत्पादन गर्ने कारखाना नभएकाले कृषि तथा पशुपक्षी विकास मन्त्रालयमार्फत अनुदानमा अन्तर्राष्ट्रिय बजारबाट आयात गरेर किसानसम्म पुर्याइने गरिएको छ । किसानले खुला सीमापारिका बजारमा सहज रूपमा रासायनिक मल पाउने तथा अवैधानिक व्यापारबाट पनि भित्रिने गरेकाले सरकारले २०६५ साल चैत १२ गतेदेखि अनुदानमा अन्तर्राष्ट्रिय बजारबाट आयात गरेर किसानसम्म पुर्याउने निर्णय लिएको थियो ।  

कृषि सामग्री कम्पनी लिमिटेडका सूचना अधिकारी पुण्यप्रसाद उपाध्यायका अनुसार यस वर्षका लागि मल मौज्दात रहेको बताउँदै थप मल आयात हुने प्रक्रियामा रहेकाले अभाव नहुने जानकारी दिनुभयो । जैविक (कम्पोष्ट) मल ठूलो मात्रामा उत्पादन भएर सहज ढुवानी गर्नसके किसानले थप प्रतिफल प्राप्त गर्न सक्ने उहाँले बताउनुभयो ।

‘सरकारी प्रयासमा एकपटक जैविक मल (भर्मि कम्पोष्ट) उत्पादन र वितरणको प्रयास भएको थियो तर त्यो सफल भएन’, उपाध्यायले भन्नुभयो, ‘ठूलो मात्रामा नियमित माग हुने भएकाले निजी क्षेत्रबाट उत्पादन हुने जैविक मल प्रयोगमा आउनुलाई सकारात्मक मान्न सकिन्छ । किसानका मागका आधारमा यसको उत्पादन र ढुवानी भने भएको छैन ।’

कृषिप्रधान नेपालमा रासायनिक मलको बढ्दो मागका कारण बर्सेनि आयात बढाउनुपर्ने बाध्यता रहनुका साथै रासायनिक मलको प्रयोगले माटोको उर्वराशक्ति खेर गइरहेको उहाँको भनाइ छ । वैदेशिक व्यापारघाटालाई सन्तुलित तुल्याउन सरकारले नीतिगत व्यवस्था गरेकाले निजी क्षेत्रको लगानीमा स्वदेशमै जैविक मल उत्पादन सुरु गरिएको उहाँले जानकारी दिनुभयो । 

धनुषामा बन्दैछ जैविक मल
धनुषाको धनुषाधाम नगरपालिका–३ मा रहेको ‘आरोह फर्टिलाइजर्स प्रालि’ले किसानको जैविक मलको मागलाई ध्यानमा राखी गत आइतबारदेखि आफ्नो उत्पादनलाई बजारमा पठाउन थालेको छ । अधिकांश स्वदेशी कच्चा पदार्थको प्रयोगबाट जैविक दानेदार र तरल मल उत्पादन गरेको कम्पनीका कार्यकारी अध्यक्ष शैलेन्द्रशम्शेर राणाले जानकारी दिनुभयो । उहाँका अनुसार कम्पनीले ‘हरियो नेपालतर्फ एक पाइला’ भन्ने अवधारणाअनुरुप वातावरणमैत्री र माटोमा उर्वराशक्ति बढाउने मल बजारमा पठाउन थालेको हो ।  

हिमाल, पहाड र तराई क्षेत्रका विभिन्न ठाउँका माटोको परीक्षणपछि उपयुक्त प्रमाणित भएसँगै मल बजार पठाउन थालिएको राणाले बताउनुभयो । रासायनिक मलको जथाभावी प्रयोगले जमिनको उर्वराशक्ति नष्ट हुने मात्र नभई मानव स्वास्थ्यमा समेत प्रतिकूल असर परेको भन्दै मलमा हुने परनिर्भरतालाई घटाउन जैविक मल उत्पादन गरिएको उहाँको भनाइ छ ।

प्रबन्ध निर्देशक आङकामी लामाले उद्योगले कच्चा पदार्थ सहज उपलब्ध भएसँगै मलको मागलाई दृष्टिगत गरी वार्षिक ३० हजार मेट्रिक टनसम्म जैविक मल उत्पादन गर्ने योजना बनाएको जानकारी दिनुभयो । उत्पादित जैविक मलको प्रयोगले जमिनको उर्वराशक्ति ५ वर्षमा पुरानै अवस्थामा पुर्याउने, कृषि उत्पादन बढाउने र उत्पादित वस्तु सम्पूर्ण हिसाबले अग्र्यानिक हुने उहाँले दाबी गर्नुभयो ।

जैविक मलको प्रयोगले माटोमा पोषण तत्व बढाउनाका साथै माटोका प्राकृतिक गुण जोगाउन सहयोग पुग्ने प्रबन्ध निर्देशक लामाले बताउनुभयो । उहाँका अनुसार कम्पनीले हाल ६ किसिमका झोल मल, ४ किसिमका दानेदार मल र २ किसिमका जैविक किटनाशक औषधि उत्पादन गरिरहेको छ ।

कम्पनीका कार्यकारी निर्देशक सवार्थशम्शेर जबराले नेपाली कृषकले बालीनाली लगाउने मनसुनमा सधँै रासायनिक महलको हाहाकार भोग्नुपरेको घटनालाई सम्बोधन गर्न आधुनिक प्रविधिबाट मुलुकको माटो र हावापानी सुहाउँदो बायो अग्र्यानिक (जैविक) मल उत्पादनमा जोड दिइएको बताउनुभयो । 

उहाँका अनुसार जैविक मलका लागि आवश्यक मुख्य कच्चा पदार्थ गाईवस्तुको गोबर भएकाले उद्योगले स्थानीय सङ्कलनका अतिरिक्त सिरहा, सर्लाही, महोत्तरीका साथै काभ्रे, भक्तपुर, काठमाडौँलगायत स्थानबाट गोबर सङ्कलन गर्दै आएको छ । जैविक मलका लागि गोबर बेचेर पशुपालक किसान पनि लाभान्वित भएका उहाँले बताउनुभयो ।

कम्पनीले बायो गेडा मल प्रतिकिलो ७० रुपैयाँ र झोल मल प्रतिलिटर ६ सय ५० रुपैयाँ बजार मूल्य तोकेको छ । कार्यकारी निर्देशक जबराले भन्नुभयो, ‘दानेदार मल १ कठ्ठा जमिनका लागि एक बोरा चाहिन्छ भने १ लिटर तरल मलले पहाडमा ८ रोपनी र तराईमा १२ कठ्ठामा पर्याप्त हुन्छ ।’

बायो मल धान, मकै, गहुँ र तरकारीका अतिरिक्त स्याउ, चिया, उखु, अलँैची, केरा, किबी, तर्बुजाका लागि फलदायी हुने उहाँको दाबी छ । यसको प्रयोगबाट उत्पादित वस्तु अग्र्यानिक भएकाले लामो समयसम्म टिक्ने कम्पनीले जनाएको छ । उद्योगका लागि आवश्यक ९० प्रतिशत कच्चा पदार्थ स्वदेशमै उपलब्ध हुन्छ भने विशेष प्रकारको माटोसहितका केही कच्चा पदार्थ भारतबाट आयात गर्नुपर्ने बाध्यता रहेको कार्यकारी निर्देशक जबराले बताउनुभयो ।

बजारमा आउनुअघि मुस्ताङका स्याउ बगानदेखि इलामको चिया र अलैँचीका लागि माग भइसकेको कम्पनीले जनाएको छ । विभिन्न बायो उद्योगबाट खेर गइरहेको पदार्थ मल उत्पादनमा कच्चा पदार्थका रूपमा प्रयोग गर्न सकिन्छ । 

कृषि तथा पशुपक्षी मन्त्रालयका पूर्वसचिव डा. योगेन्द्र कार्कीले जैविक मलको प्रयोगले माटो नबिगार्ने र उर्वराशक्ति बढाउने बताउनुभयो । उहाँले भन्नुभयो, ‘यो मलको प्रयोगले साधारण अवस्थामा कृषि उत्पादन वृद्धि हुन्छ । जथाभावी रासायनिक मलको प्रयोगबाट उर्वराशक्ति गुमेको माटोलाई पहिलकै अवस्थामा पुर्याउन सहयोग हुन्छ ।’

-रासस