नेपालकै ठुलो साइकल जात्रा ‘कोरा २०२४’ आयोजना हुने

फाइल तस्विर

आफ्नै खबर

३ साउन २०८१ बिहिबार (५ महिना अघि)

पाठक संख्या ८५

काठमाडौं/  साउन ५ गते शनिवार देशकै ठुलो साइकल जात्रा ‘कोरा २०२४’ को १४ औं संस्करण आयोजना हुने भएको छ । करिब ४ हजार साइकल यात्रीले नेपालको १५ भन्दा बढी स्थानमा २ लाख किलोमिटर भन्दा बढी दुरी तय गर्नेगरी साइकल जात्रा आयोजना हुने भएको हो । 

हरेक वर्ष जस्तै यो वर्ष पनि साइकल यात्रीहरुले सामाजिक कामको लागि रकम पनि संकलन गर्ने जनाइएको छ । यो वर्ष संकलन गरिने रकम ललितपुरको गुन्सिङ्गालमा रहेको साइकल पम्प ट्रयाक जस्तै नेपालगञ्जमा रहेको पम्प ट्रयाक सुधार गर्न प्रयोग गरिने जनाइएको छ ।  

सन् २०११ मा ३५ जनाबाट सुरु भएको काठमाडौँ कोरा साइकल यात्रा हरेक वर्ष पाटनको मंगलबजारबाट सुरु भइ काठमाडौँ उपत्यकाको एक फन्को लगाएर पाटनकै नागबाहालमा अन्त हुने गर्छ । साइकल यात्रीहरुले यस क्रममा आफ्नो इच्छा अनुसार ५० किलोमिटर, ७५ किलोमिटर, १०० किलोमिटर वा १४० किलोमिटरको यात्रा तय गर्नेछन् । हरेक वर्ष जुलाई महिनाको तेस्रो शनिवार आयोजना हुने कोरामा यो वर्षको काठमाडौँ कोरामा ललितपुर महानगरपालिका पनि सहआयोजकको रुपमा सहभागी भएको छ ।  

ललितपुर महानगरपालिकाका मेयर चिरिबाबु महर्जनले भन्नुभयो, ‘ललितपुर स्मार्ट सिटी बन्न चाहन्छ र यसको लागि नगरवासीहरुले साइकल चढ्न सक्ने वातावरण बनाइ साइकल संस्कृतिको विकास गर्न आवश्यक छ । हामीले ललितपुरमा साइकल प्रवर्द्धन गर्न साइकल लेन र साइकल स्टेन्ड बनाउने र महिला साइकल यात्रीहरुलाई सहयोग गर्ने काम गरिरहेका छौं र ‘कोरा’ जस्ता स्थानीय प्रयासहरुसँगको सहकार्यले यस अभियानलाई थप टेवा दिनेछ ।’   

साइकल संस्कृतिको विकास गर्न महिला, बालबालिका लगायत समाजका सबै वर्गलाई समेत समावेश गर्न आवश्यक भएकोले कोराले महिला सहभागिता बढाउन विशेष प्रयास गर्दै आइरहेको जनाइएको छ । यसैले गएको वर्ष काठमाडौँ कोरामा महिला यात्रीहरुको संख्या ३४ प्रतिशत पुगेको थियो । यसै सम्बन्धमा ललितपुरका विभिन्न भागमा महिलाहरुलाई साइकल चढ्ने, साइकलको मर्मत सम्भार गर्ने र प्राथमिक उपचारको तालिम दिने काम पनि भैरहेको र यसमा स्थानीय महिला समुहहरुका साथै युएसएड स्वच्छ हावा आयोजनाको समेत सहभागिता रहेको जनाइएको छ ।

कोरा आयोजनाको मूल उद्देश्य देशभरि नै साइक्लिस्ट समुदायहरु विकास गरि साइकल संस्कृतिको प्रवर्द्धन गर्नु हो ।  यसमा सोसल टुर्स, साइकल सिटी नेटवर्क नेपाल, पाङ्ग्रो, ललितपुर महानगरपालिका, युएसएड स्वच्छ हावा, अष्ट्रेलियन राजदुतावास, नबिल बैंक, टर्किस एअरलाइन्स, हिमालयन एभेरेस्ट इन्स्युरेन्स लगायत विभिन्न संघ संस्थाले सहकार्य गरेको जनाइएको छ ।