अनुदानले बढायो दूध उत्पादन

आफ्नै खबर

१३ साउन २०८१ आईतबार (४ महिना अघि)

पाठक संख्या ५६

नवलपरासी/ नवलपरासी(बर्दघाट–सुस्तापूर्व)को हुप्सेकोट गाउँपालिकाले दूध उत्पादक किसानलाई अनुदान दिन थालेपछि उत्पादनमा वृद्धि भएको छ । दूध उत्पादनमा आत्मनिर्भर बनाउने उद्देश्यले गाउँपालिकाले आर्थिक वर्ष २०७८/७९ देखि अनुदान दिन थालेपछि प्रत्येक वर्ष उत्पादनमा वृद्धि हुँदै गएको हो । 

सहकारीले सञ्चालन गरेको दुग्ध डेरीमार्फत दूध बिक्री गर्ने किसानलाई प्रतिलिटर दूधमा ७ रुपैयाँ ५० पैसाका दरले गाउँपालिकाले अनुदान रकम उपलब्ध गराएको हो । आर्थिक वर्ष २०८/८१ मा ७५ हजार २ सय लिटर दूधमा ५ लाख ६४ हजार रुपैयाँ अनुदान रकम वितरण गरिएको गाउँपालिकाका प्रमुख प्रशासकीय अधिकृत हरिप्रसाद पराजुलीले जानकारी दिनुभयो ।

उहाँले भन्नुभयो, ‘गत आवमा सहिद प्रदुक बहुउद्देश्यीय सकारी संस्थाले २२ हजार लिटर दूधमा २ लाख ७३ हजार रुपैयाँ साना किसान कृषि सहकारी संस्थाले ३५ हजार ३ सय लिटर दूधमा २ लाख ६५ हजार रुपैयाँ र शिवमन्दिर महिला बहुउद्देश्यीय सहकारी संस्थाले ३ हजार ४ सय लिटर दूधमा २५ हजार रुपैयाँ लनुदान लगेका छन् ।’

गाउँपालिकाले आव २०७९/८० सम्म प्रतिलिटर ५ रुपैयाँ अनुदान दिँदै आएकामा गत आवदेखि अनुदान रकम वृद्धि गरेको हो । पालिकाले प्रतिलिटर १० रुपैयाँ अनुदान रकम उपलब्ध गराउने घोषणा गरे पनि गण्डकी प्रदेश सरकारले पनि दूधमा अनुदान उपलब्ध गराएकाले प्रदेशबाट किसानलाई प्राप्त रकम घटाएर प्रतिलिटर १० रुपैयाँ हुने गरी अनुदान वितरण गरिएको गाउँपालिकाका अध्यक्ष लक्ष्मीदेवी पाण्डेले जानकारी दिनुभयो । अनुदान रकम साना किसानसम्म पु¥याउन एक आवमा सहकारीमार्फत बिक्री गरेको दूधको परिमाणअनुसार रकम उपलब्ध गराइएको उहाँका भनाई थियो । 

‘गाउँपालिकाभित्र रहेका दुग्ध सहकारीले उपलब्ध गराएको वार्षिक तथ्याङ्कका आधारमा अनुदान दिने व्यवस्था गरेका छौँ’, अध्यक्ष पाण्डेले भन्नुभयो, ‘उत्पादनका आधारमा अनुदान दिने नीतिअनुरूप आर्थिक वर्ष २०७८/७९ देखि यसलाई निरन्तरता दिँदै आएका छौँ ।’ उत्पादनका आधारमा अनुदान दिँदा साना किसान लाभान्वित भएका भन्दै दूध उत्पादन र पशु पाल्ने किसानको सङ्ख्या पनि वृद्धि भएको उहाँले बताउनुभयो । 

‘हुप्सेकोट गाउँपालिकालाई दुग्ध उत्पादनमा आत्मनिर्भर बनाउने लक्ष्यअनुसार कृषकलाई आकर्षित गर्ने कार्यक्रम अगाडि सारिएका छन्’, उहाँले भन्नुभयो, ‘गाउँपालिकाको पहाडी क्षेत्रमा पशुपालन कम हुनेहुँदा यस क्षेत्रमा दूध उत्पादन कम हुने गरेको छ ।’

आव २०७९/८० मा कूल ५७ हजार ३ सय लिटर दूधमा प्रतिलिटर ५ रुपैयाँका दरले २ लाख ८७ हजार रुपैयाँ अनुदान रकम प्रदान गरिएको गाउँपालिकाका लेखा अधिकृत राजेन्द्रप्रसाद रेग्मीले जानकारी दिनुभयो । 

-रासस