दूध बेचेर मासिक लाख आम्दानी

आफ्नै खबर

१९ साउन २०८१ शनिबार (४ महिना अघि)

पाठक संख्या ७५

दाङ/  घोराही उपमहानगरपालिका–१३ का रवि घर्तीले ३ वर्षदेखी व्यावसायिक रुपमा पशुपालन गर्दै आउनुभएको छ । व्यावसायिकरुपमा लाग्नुभएका घर्तीले साथीहरुसँग मिलेर भैँसीपालन, बङ्गुरपालन र हाँसपालन गर्दै आउनुभएको छ । 

मेहनत गर्नसके पशुपालनबाट मनग्य आम्दानी लिन सकिने ‘गोरखा बायो फार्म’का अध्यक्ष रहनुभएका घर्तीले भन्नुभयो, ‘भैँसी र बङ्गुरपालन गरेर राम्रै आम्दानी भइरहेको छ ।’  घोराही उपमहानगरपालिका–७ घुस्रामा ५ बिघा जग्गा किनेर व्यावसायिकरुपमा पशुपालन गर्दै आउनुभएका उहाँले दूध बिक्री गरेर मासिक १ लाखभन्दा बढी आम्दानी भइरहेको बताउनुभयो । उहाँको फार्ममा १८ भैँसी र २५ बङ्गुर रहेका छन् । 

उत्पादन गरेको दूध घरबाटै बिक्री हुने गरेको घर्तीले बताउनुभयो । उहाँले भन्नुभयो, ‘दूध बिक्री गर्न समस्या छैन । फार्मबाटै विद्यालय र डेरीमा जाने गरेको छ ।’ दैनिक ४५ देखि ५० लिटरसम्म दूध बिक्री भइरहेको घर्तीले बताउनुभयो । फार्ममा कम्तीमा ४० भैँसी र जर्सी गाईसमेत थप गर्ने उहाँको योजना छ । 

बजारको मागसँगै प्रशस्तमात्रामा घाँससँगै पानीको व्यवस्था भएकाले दूध उत्पादनलाई प्राथमिकता दिएको घर्ती बताउनुहुन्छ । दूध प्रतिलिटर ७० रुपैयाँमा बिक्री हुने गर्दछ । भैँसीपालनसँगै मासुका लागि बाख्रा, बङ्गुर, हाँस र व्यावसायिक तरकारी खेतीलाई पनि अघि बढाउने तयारी रहेको अर्का सञ्चालक खुसीराम चौधरी बताउनुहुन्छ । त्यसका लागि उहाँ थप संरचना निर्माण गर्ने तयारीमा हुनुहुन्छ ।

व्यावसायिक रुपमा दूध र मासुसँगै तरकारी उत्पादन गर्ने उद्देश्यले फार्ममा अहिलेसम्म करिब १ करोड ५० लाखसम्म लगानी भइसकेको चौधरीले बताउनुभयो । फार्ममा ३ जनाले रोजगारी पाएका छन् । पशुपालनका लागि सुपर नेपियर, किमु, इपिलइपिल, सुडान, मकैचरी, मकैलगायतका घाँसखेती समेत गरिएको छ ।  

-रासस