अकबरेखेतीबाटै वार्षिक १५ लाख आम्दानी

आफ्नै खबर

    (९ महिना अघि)

पाठक संख्या ११९

इलाम/  माङसेबुङ गाउँपालिका–२ का  खड्गबहादुर कार्कीलाई घरखर्च टार्न अरुको मुख ताक्नुपरेको छैन । आफ्नै  बारीमा गरेको व्यावसायिक अकबरेखेतीबाट घरखर्च चलेको छ । उहाँले वार्षिक १५ लाख रुपैयाँ आर्जन गर्दै आउनुभएको छ । 

मलेसियाको रोजगारीबाट फर्केर २ वर्षअघि ‘बताहा कृषि तथा नर्सरी फार्म’ दर्ता गरी व्यावसायिक रूपमा अकबरेखेती सुरु गर्नुभएका उद्यमी कार्कीले वार्षिक १५ लाख रुपैयाँ आम्दानी गर्दै आउनुभएको छ । ‘गत वर्ष १ हजार बोटबाट ११ क्विन्टल अकबरे उत्पादन भएको थियो, पहिलोपटक नै प्रशस्त आम्दानी भयो’, कार्कीले भन्नुभयो, ‘प्रतिकेजी २ सय ५० देखि ३ सय रुपैयाँसम्ममा बारीमा नै बिक्री हुने भएकाले यस वर्षदेखि खेती विस्तार गरेको छु ।’ 

यो वर्ष उहाँले ५ हजार बोट अकबरे रोप्नुभएको छ । आफ्नै ४ तथा छिमेकीको ४ रोपनी जग्गा भाडामा लिएर ८ रोपनी क्षेत्रमा खेती विस्तार गर्नुभएको हो । उत्पादिन अबकरे बिक्रीका लागि बजारको चिन्ता नभएपछि खेती विस्तार गरेको उहाँ बताउनुहुन्छ । ‘सबै खर्च कटाएर वार्षिक १० देखि १५ लाख रुपैयाँसम्म कमाइ गर्ने लक्ष्यका साथ खेती विस्तार गरेको छु’, कार्कीले भन्नुभयो,  ‘२ वर्षसम्म यही बोटले उत्पादन दिन्छ, हरियो खुर्सारी दिनैपिच्छे पनि टिप्न पाइन्छ तर पाकेको भने सातामा २ पटक टिप्न मिल्छ, १ हजार बोटबाट पहिलोपटक ३० र दोस्रो खेपमा २० केजीसम्म उत्पादन हुन्छ ।’

हरियो खुर्सानी प्रतिकेजी २ सय ५० रुपैयाँमा बारीबाटै बिक्री हुने गरेको छ । यहाँ उत्पादित अकबरे इलाम बजारसहित झापाको दमक र सुनसरीको इटहरीसम्मका व्यापारीले लैजाने गरेका छन् ।

सुरुमा थोरै लगानीमा आफ्नै बारीमा अकबरेखेती सुरु गर्नुभएका कार्कीले १० हजार बोट अकबरे विस्तार गर्ने योजनामा रहेको सुनाउनुभयो । उहाँले अबकरेका साथै गोलभेँडा, भण्टा, बन्दाकोभी, प्याजखेती तथा एभोकाडो र कफीका बिरुवा पनि उत्पादन गर्दै आउनुभएको छ ।

-रासस