तेह्रथुमबाट १ वर्षमा ५३ करोडको काठ बिक्री

प्रतिकात्मक तस्विर

आफ्नै खबर

२२ साउन २०८१ मंगलबार (४ महिना अघि)

पाठक संख्या ४३

तेह्रथुम/  आर्थिक वर्ष २०८०/८१ मा ५३ करोड रुपैयाँ मूल्य बराबरको गोलिया काठ जिल्ला वाहिर बिक्री भएको छ । गोलिया काठ निर्यातबापत सङ्घीय सरकारलाई ७ करोड ३१ लाख ६९ हजार रुपैयाँ मूल्य अभिवृद्धि कर सङ्कलन भएको छ भने ७८ लाख ८५ हजार रुपैयाँ प्रदेश सेवा शुल्कबापत राजस्व सङ्कलन भएको छ । 

गत आर्थिक वर्षको १२ महिनामा तेह्रथुमका निजी वनबाट २६ लाख ४१ हजार १ सय ८६ क्युफिट गोलिया काठ जिल्लाबाहिर निर्यात भएको डिभिजन वन कार्यालयका निमित्त डिभिजनल प्रमुख उधिमप्रसाद राईले बताउनुभयो । उहाँका अनुसार निर्यात भएका सबै गोलियालाई सरकारी दरमा हिसाब गर्दा त्यति मूल्यको पर्ने देखिन्छ । उहाँले भन्नुभयो, ‘बाहिर बजारमा सरकारी दरभन्दा बढीमा पनि कारोबार हुने भएकाले हामीले हिसाब गरेकोभन्दा अझै बढी मूल्यको गोलिया हुन जान्छ ।’ 

निर्यात हुने गोलियामा ९० प्रतिशत ‘बी’ ग्रेडका उतिसका रूख  हुने गर्छन् । गोलियाको गुणस्तर अनुसार ‘ए’ ग्रेड र ‘बी’ ग्रेडमा छुट्याइएको छ । त्यसमा काठ व्यवसायीले ‘ए’ ग्रेडको उतिसको ४५ रुपैयाँ ५० पैसा प्रति क्युफिट मूल्य अभिवृद्धि कर तिरेका छन्भने ‘बी’ ग्रेडको ३२ रुपैयाँ ५० पैसा तिरेका छन् । 

पछिल्लो समय वैदेशिक रोजगारी तथा अन्य कारणले तेह्रथुमका गाउँगाउँका जनसङ्ख्या घट्दो छ । बाँझिएका खेतबारीमा आफैँ उम्रिने रूखहरु ८–१० वर्षमा गोलिया बेच्न लायक हुने गरेको वन पैदावार व्यवसायी सङ्घका अध्यक्ष उत्तम लिम्बूले बताउनुभयो । उहाँले सो व्यवसाय गरेर स्थानीय १२ जनालाई रोजगारी दिइरहनुभएको बताउनुभयो । यहाँबाट निर्यात हुने गोलिया काठमा सबैभन्दा बढी उतिस तथा केही मात्रामा चिलाउने, मलातो, पात्ले रहेको छ । 

त्यसैगरी, राष्ट्रिय वनको गैरकाष्ठ वन पैदावार जडीबुटी  गत आर्थिक वर्षमा २४ हजार ६ सय किलो यहाँबाट निर्यात भएको छ । त्यसबाट  मूल्य अभिवृद्धि करबापत ३३ हजार ७ सय रुपैयाँ सङ्कलन भएको छ । तेह्रथुमबाट निर्यात हुने जडीबुटीहरुमा मजिटो, चिराइतो, लोक्तालगायत रहेका छन् ।

-रासस