पालिकाले दियो २ सय १० परिवारलाई विद्युतीय चुलो

आफ्नै खबर

६ भदौ २०८१ बिहिबार (३ महिना अघि)

पाठक संख्या ५१

मुस्ताङ/ लोमन्थाङ गाउँपालिकाको २ वटा वडाका बासिन्दालाई विद्युतीय चुलो वितरण गरिएको छ । दाउरा र ग्यासको खपत घटाएर जलवायु परिवर्तनका असर न्यूनीकरण तथा वातावरण संरक्षणका लागि लोमन्थाङ गाउँपालिकाले चुलो वितरण गरेको हो ।

गाउँपालिकाका अध्यक्ष टसीनर्बु गुरुङका अनुसार वडा नं ३ फुवा र वडा नं ४ किमलिङका २ सय १० परिवारलाई निःशुल्क १–१ थान विद्युतीय चुलो वितरण गरिएको छ । उहाँले भन्नुभयो ‘दाउराको विकल्पमा विद्युतीय चुलोको प्रयोग बढाएर वातावरण संरक्षणको प्रयास गरेका हौँ ।’ अध्यक्ष गुरुङ र उपाध्यक्ष छ्युमी विष्टसहित वडाका जनप्रतिनिधिले बुधबार सम्बन्धित वडामा पुगेर चुलो वितरण गर्नुभएको हो  ।

विद्युतीय चुलो खरिदका लागि गत वर्ष ८ लाख रुपैयाँ विनियोजन गरेको लोमन्थाङ गाउँपालिकाले यस वर्ष पनि बजेट व्यवस्था गरेको र खरिद गरेर बाँकी ३ वटा वडाका सबै परिवारलाई वितरण गरिने जनाएको छ ।

-रासस