गाउँपालिका आफैंले बनायो झोलुङ्गे पुल

आफ्नै खबर

२५ भदौ २०८१ मंगलबार (३ महिना अघि)

पाठक संख्या ३६

सिन्धुपाल्चोक/  लार्के र इन्द्रावती नदीमा गत असार ३० मा आएको बाढीले पूर्णरुपमा क्षति पुर्याएको झोलुङ्गे पुल पुनःनिर्माण गरिएको छ । पाँचपोखरी थाङ्पाल गाउँपालिका–३ भोताङ र वडा नं २ याङ्ग्री जोड्ने झोलुङ्गे पुल इन्द्रावती नदीमा आएको बाढीले क्षति पुर्याएको थियो । 

बाढीले गाउँपालिकाको तीन वटा झोलुङ्गे पुलमा क्षति पुगेको थियो । त्यसमध्ये गाउँपालिकाकै स्रोतबाट चिण्डे र याङग्रीको पुल पुनःनिमार्ण भईसकेको गाउँपालिका अध्यक्ष टासी लामाले जानकारी दिनुभयो । बाढीले क्षति पुर्याएको माकालमा भने मोटरेबल पुल निमार्ण गर्न बोलपत्र आह्वान गर्ने तयारी गरिएको अध्यक्ष लामाले बताउनुभयो ।

वडा नं २ को याङ्ग्री, सुनचौर, डाले, ब्राथोर, रिपार लगायतका स्थानीय हिँड्नका लागि प्रयोग हुने एकमात्र झोलुङ्गे पुलमा क्षति पुगेपछि समस्या भएको स्थानीय केशाङ तामाङले बताउनुभयो । तामाङका अनुसार विद्यार्थी, स्थानीय र धार्मिकस्थल आमायाङ्ग्री जाने पर्यटकलाई समस्या भएको थियो । 

पुलमा क्षति पुगेपछि सङ्घ र प्रदेश सरकारलाई पटक–पटक आग्रह गरेपनि सुनुवाइ नभएको गाउँपालिका अध्यक्ष लामाले बताउनुभयो । कतैबाट सुनुवाइ नभए पछि गाउँपालिकाकै स्रोत र साधनबाट पुल पुनः निमार्णको प्रक्रिया अगाडि बढाइएको उहाँको भनाइ छ । 

उक्त पुलमा २०७८ असार १ गतेको बाढीलेसमेत क्षति पुर्याएको थियो । तत्कालीन अवस्थामा गाउँपालिकाले बजेट विनियोजन गरी पुल निमार्ण गरिएको थियो । त्यसको ३ वर्ष नबित्दै पुनः बाढीले क्षति पुर्याएको हो । 

१ सय ६२ मिटर लामो पुल ३४ लाख रुपैयाँ लागतमा पुनःनिर्माण गरिएको छ । त्यस्तै वडा नं. १ र ६ जोड्ने चिण्डे ६५ मिटर लामो पुल १३ लाख रुपैयाँमा निर्माण गरिएको गाउँपालिकाले जनाएको छ ।

-रासस