संरक्षणका लागि पाँच लाख शालिग्राम जुटाइँदै

आफ्नै खबर

४ कात्तिक २०८१ आईतबार (१ महिना अघि)

पाठक संख्या ७८

बागलुङ/  कुडुलेमा शालिग्राम संरक्षणका लागि सङ्ग्रहालय बनेको ६ वर्ष पुग्यो । तिरुपति बालाजीधाममा सङ्ग्रह गरेका २४ हजार शालिग्रामलाई सङ्ग्रहालय बनाएर संरक्षण थालिएको थियो ।

संरक्षण अभियानले तीव्रता पाएपछि शालिग्रामको सङ्ख्या बढाएर सवा लाख पुर्याइयो । अहिले बढाएर पाँच लाख पुर्याउने लक्ष्यसहित शालिग्राम खोजीलाई पनि तीव्रता दिइएको छ । 
भूमिगत सङ्ग्रहालयमा सजाएर राखिएका शालिग्राम शिला दर्शन गर्न आउने नेपाली तथा विदेशी पर्यटकको सङ्ख्या बढेपछि सङ्ख्यालाई थप गर्ने योजना श्रीधराचार्य शालिग्राम सङ्ग्रहालयले लिएको छ । 

शालिग्राम सङ्ग्रहालय त्रिशूल आकारमा भू–गर्भभित्र ७६ मिटर लामो सुरुङ निर्माण गरी व्यवस्थित गरिएको छ । यहाँ सङ्ग्रहालय, त्रिवेणीधामबाट दामोदर कुण्डसम्मको नक्सा, विभिन्न धार्मिक महत्वका मठमन्दिर, वृतचित्र, प्रदर्शनी कक्षलगायत संरचना निर्माण गरिएका छन् ।

श्रीधराचार्य शालिग्राम सङ्ग्रहालयका अध्यक्ष ऋषि प्रपन्नाचार्यले लोप हुन थालेको शालिग्रामको महत्व बढ्दै जानु, सङ्ग्रहालय अवलोकनका लागि आउने धार्मिक पर्यटकको सङ्ख्या बढ्दै गएकाले सङ्ख्या थपेर पाँच लाख पुर्याउने उद्देश्यअनुसार जुटाउन थालिएको बताउनुभयो । 

‘कालीगण्डकी नदीमा मात्र पाइने शालिग्राम शिला हिन्दू धर्मावलम्बीका लागि महत्वपूर्ण र पुज्य छ । कालीगण्डकीको दोहन र शालिग्रामको चोरी बढेकाले पछिल्लो पुस्तालाई शालिग्राम देख्नै नपाउने अवस्था नआउला भन्न सकिँदैन’, अध्यक्ष प्रपन्नचार्यले भन्नुभयो, ‘शालिग्रामको संरक्षणसँगै धार्मिक पर्यटक भित्र्याउने हाम्रो लक्ष्य थियो, २४ हजार शालिग्राम सङ्कलन गरी थालिएको अभियानलाई सवा लाखमा पुर्याएको थियो ।’

अहिले सङ्ग्रहालयको पूर्वतर्फ शालिग्राम राख्न पूर्वाधार तयार गरी दोस्रो चरणअन्तर्गत करिब तीन लाख शालिग्राम पुर्याउने उद्देश्यले सङ्कलनमा जुटेको प्रपन्नचार्यले जानकारी दिनुभयो । उहाँले भन्नुभयो, ‘केही वर्षभित्र शालिग्रामको सङ्ख्या बढाएर पाँच लाख पुर्याउने योजना छ, एकै पटक पाँच लाख शालिग्राम सङ्ग्रह गरिएको स्थान विश्वमा चर्चित बन्ने विश्वास लिएका छौँ ।’

प्रपन्नचार्यका अनुसार शालिग्राम संरक्षण र पर्यटकीय पूर्वाधार निर्माण एकसाथ अघि बढिरहेकोे छ । लोपन्मुख मानिएको शालिग्राम शिलाको सङ्ग्रह गरी बनाइएको सङ्ग्रहालयमा पर्यटकको आकर्षण बढ्न थालेपछि शालिग्राम संरक्षण अभियानले तीव्रता पाएको उहाँले उल्लेख गर्नुभयो । 

धार्मिक महत्व जगाउन, कालीगण्डकी सभ्यता जोगाउन र शालिग्रामको संरक्षण गर्न अभियान थालिएको भन्दै वर्षौँदेखिको योजनाले क्रमशः सफलता पाउँदै गएको उहाँले बताउनुभयो । 

विश्वमै दुर्लभ मानिएको शालिग्राम शिलाको संरक्षण र प्रचारप्रसारका कारण बागलुङ–४ कुडुलेस्थित शालिग्राम सङ्ग्रहालयमा धार्मिक पर्यटक आउने क्रम बढ्दै गएको छ । दसैँ र तिहार जस्ता चाडपर्वको समयमा धेरै धार्मिक पर्यटक आउने गरेका बताउँदै अध्यक्ष प्रपन्नचार्यले चार वर्षदेखि सर्वसाधरणलाई खुल्ला गरिएको भूमिगत सङ्ग्रहालयले शालिग्रामको संरक्षण गर्न थालेपछि भारतीय पर्यटकसमेत आकर्षित हुन थालेका जानकारी दिनुभयो ।

मुस्ताङको मुक्तिनाथबाट म्याग्दी, बागलुङ र पर्वत भएर बहने कालीगण्डकी (कृष्णगण्डकी) नदीमा मात्र पाइने शालिग्राम शिलाको संरक्षण गर्न बागलुङ–४ कुडुलेस्थित तिरुपति बालाजीधाममा श्रीधराचार्य शालिग्राम सङ्ग्रहालय निर्माण भएपछि शालिग्राम दर्शन गर्न आउने धार्मिक पर्यटकको सङ्ख्या वृद्धि भएको हो । शालिग्राम संरक्षणसँगै यसको सङ्ख्या बढाउन सङ्कलन अभियान थालिएको अध्यक्ष प्रपन्नचार्यले उल्लेख गर्नुभयो ।

हिन्दूधर्मावलम्बीका लागि कालो रङ्गको बाटुलो शिला (ढुङ्गा) शालिग्राम अति पूजनीय मानिन्छ । वैष्णवहरु र सनातनीहरुले पनि शालिग्रामलाई साक्षात विष्णुको अवतारका रुपमा लिने गरेकाले यसको महत्व धेरै रहेको अध्यक्ष प्रपन्नचार्यले जानकारी दिनुभयो । 

सङ्ग्रहालय अवलोनका लागि विद्यालय, आमा समूह, सहकारी, स्थानीय तहका कर्मचारी, जनप्रतिनिधि तथा धार्मिक पर्यटक उल्लेख्य मात्रमा यहाँ आउने गरेका छन् । अहिले दैनिक तीन सयको हाराहारीमा पर्यटक शालिग्राम दर्शनका लागि  आउने गरेका अध्यक्ष प्रपन्नचार्यले जानकारी दिनुभयो । 

शालिग्रामको महिमा बढाउन सङ्ग्रहालयले शालिग्राम महोत्सव, शालिग्रामसम्बन्धी प्रवचन गरिरहेको बताउँदै शालिग्राम दर्शनपछि पुण्य कमाउने विश्वासका साथ यहाँ आउने दर्शनार्थीको सङ्ख्यामा वृद्धि हुँदै गएको स्थानीय रामप्रसाद शर्माले उल्लेख गर्नुभयो । शालिग्राम थप गरेर पाँच लाख पुर्याउने अभियानले स्थानीयमा उत्साह छाएको उहाँको भनाइ छ ।

भगवान् शिवको प्रिय अस्त्रका रुपमा मानिने शालिग्राम सङ्ग्रहालय त्रिशूल आकारमा भू–गर्भभित्र ७६ मिटर लामो सुरुङ निर्माण गरी व्यवस्थित गरिएको छ । यहाँ सङ्ग्रहालय, त्रिवेणीधामबाट दामोदर कुण्डसम्मको नक्सा, विभिन्न धार्मिक महत्वका मठमन्दिर, वृतचित्र, प्रदर्शनी कक्षलगायत संरचना निर्माण गरिएका छन् । सङ्ग्रहालयमा स–साना तथा तीन सय किलोसम्मका शालिग्राम संरक्षण गरी राखिएका छन् ।

–रासस