एउटै विद्यालयमा १२ वटा अक्षयकोष

आफ्नै खबर

२७ कात्तिक २०८१ मंगलबार (३ हप्ता अघि)

पाठक संख्या ५६

खोटाङ/  दिक्तेल रुपाकोट मझुवागढी नगरपालिका–५ लफ्याङमा सञ्चालित श्री माध्यमिक विद्यालय बाँसबोटेमा अक्षयकोषको सङ्ख्या १२ पुगेको छ । कक्षा १२ सम्म अध्ययन÷अध्यापन हुँदै आएको माविको ६४औँ वार्षिकोत्सवमा ‘किराँत चाम्लिङ राई चन्दाहँछा’ परिवारले ५१ हजार रुपैयाँको अक्षयकोष स्थापना गरेसँगै उक्त विद्यालयमा अक्षयकोषको सङ्ख्या १२ पुगेको हो । 

पहिलो चरणमा ५१ हजार रुपैयाँ जम्मा गरेर स्थापना गरिएको अक्षयकोषलाई बर्सेनि बढाउँदै लैजाने योजना रहेको अक्षयाकोषका संरक्षक एवं जिल्ला समन्वय समिति खोटाङका पूर्वप्रमुख बबि चाम्लिङले जानकारी दिनुभयो । अक्षयकोषबाट आएको ब्याजले हरेक वर्ष सर्वोत्कृष्ट अङ्क ल्याएर कक्षा १२ उत्तीर्ण गर्ने एकजना विद्यार्थीलाई उच्च शिक्षा अध्ययनका लागि प्रतोत्साहनस्वरुप पुरस्कृत गरिने जनाइएको छ । 

अक्षयकोषका लागि चन्दाहँछा परिवारले उपलब्ध गराएको नगद रकम जिल्ला समन्वय समिति खोटाङका प्रमुख सनबहादुर राईमार्फत विद्यालय प्रशासनलाई हस्तान्तरण गरिएको छ । विद्यालयको शैक्षिक गुणस्तर सुधारका लागि दिवङ्गत आफन्तको स्मृति तथा वंश नाम राखेर विद्यालयमा अक्षयकोष स्थापना गरिएको अभिभावकले बताएका छन् । 

२०१७ सालमा स्थापना भएको विद्यालयमा यसअघि एकै वर्ष चारवटा अक्षयकोष स्थापना भएको थियो । २०६८ सालमा एक लाख ११ हजार ११ रुपैयाँको स्वर्गीय मनमाया राई स्मृति अक्षयकोष, ७८ हजार तीन सय १३ रुपैयाँको भूतपूर्व विद्यार्थी अक्षयकोष, ५५ हजार रुपैयाँको सेरालुङहँछा अक्षयकोष र ५१ हजार रुपैयाँको स्वर्गीय दैवप्रसाद–तुलसा स्मृति अक्षयकोष स्थापना गरिएको हो । 

यस्तै, २०७२ सालमा एक लाख रुपैयाँको स्वर्गीय चिमा राई स्मृति क्षयकोष, २०७५ सालमा ५५ हजार पाँच सय ५५ रुपैयाँको स्वर्गीय विद्याकुमारी कार्की स्मृति अक्षयकोष, २०७५ सालमा नै ५१ हजार रुपैयाँको स्वर्गीय भीमप्रसाद घिमिरे स्मृति अक्षयकोष, २०७६ सालमा एक लाख एक हजार रुपैयाँको स्वर्गीय जसमान–जयमति राई स्मृति अक्षयकोष स्थापना गरिएको थियो । 

२०७८ सालमा दुई लाख २२ हजार दुई सय २२ रुपैयाँको स्वर्गीय असुनमाया राई स्मृति अक्षयकोष, सोही वर्ष ५० हजार रुपैयाँको स्वर्गीय आमा–छोरा स्मृति अक्षयकोष र २०७९ सालमा ७१ हजार एक सय ११ रुपैयाँको स्वर्गीय दीपबहादुर–नैनकुमारी श्रेष्ठ स्मृति अक्षयकोष स्थापना गरिएको हो । 

विद्यालयमा स्थापना भएको १२ वटा अक्षयकोषको सावाँब्याज गरी १७ लाख ३० हजार दुई सय ९९ रुपैयाँ पुगेको विद्यालयका शिक्षक एवं अक्षयकोष व्यवस्थापन समितिका संयोजक यादवप्रसाद घिमिरेले जानकारी दिनुभयो । अक्षयकोषबाट आएको ब्याजमध्ये एक लाख तीन हजार रुपैयाँ यस वर्षको वार्षिकोत्सवमा कक्षा ६ देखि कक्षा १२ सम्मका विद्यार्थीलाई छात्रवृत्ति वितरणका लागि छुट्याइएको जनाइएको छ । 

अक्षयकोषमा जम्मा भएको रकम वार्षिक १८ प्रतिशत ब्याज लगाएर नौ प्रतिशत छात्रवृत्ति र नौ प्रतिशत कोषमा जम्मा गर्ने गरिएको विद्यालयका प्रधानाध्यापक पूर्णकुमार राईले जानकारी दिनुभयो । चन्दा सङ्कलन र अक्षयकोषबाट कक्षा ११ र १२ सञ्चालन गरिएको विद्यालयमा तीन सय ६१ जना विद्यार्थी अध्ययनरत छन् । 

वार्षिकोत्सवमा सबैलाई ट्रयाकसुट
चार दिनसम्म मनाइने ६४औँ वार्षिकोत्सवको औपचारिक शुभारम्भ जिल्ला समन्वय समिति खोटाङका प्रमुख सनबहादुर गर्नुभएको छ । निकै तामझामका साथ उद्घाटन गरिएको कार्यक्रमको पहिलो दिन अक्षयकोष स्थापनाका साथै नगरपालिकास्तरीय अन्तरमावि छात्र भलिबल प्रतियोगिताको प्रारम्भ गरिएको छ । 

यसैबीच, वडा नम्बर ५ लफ्याङले विद्यालयको वार्षिकोत्सवका अवसर पारेर त्यहाँ अध्ययनरत बाल विकास केन्द्रदेखि कक्षा १२ सम्मका तीन सय ६१ जना छात्रछात्रालाई ट्रयाकसुट वितरण गरेको छ । वडा कार्यालयले विनियोजन गरेको ६ लाख रुपैयाँ बजेटबाट खरिद गरिएको ट्रयाकसुट वडामा सञ्चालित अन्य विद्यालयका विद्यार्थीलाई समेत वितरण गरिएको वडाध्यक्ष एवं नगर प्रवक्ता दिनेश घिमिरेले जानकारी दिनुभयो ।

–रासस