कोशीका ३० पालिकामा अपाङ्गता रोकथाम कार्यक्रम

आफ्नै खबर

३० कात्तिक २०८१ शुक्रबार (२ हप्ता अघि)

पाठक संख्या ४४

झापा/  अपाङ्गता भएका व्यक्तिहरूको स्वास्थ्य परीक्षण, पहिचान र परिचयपत्र वितरण गर्ने उद्देश्यले कोशी प्रदेशका ३० वटा पालिकामा कार्यक्रम सञ्चालन हुने भएको छ । 

अपाङ्गता रोकथाम तथा पुनःस्थापनाका लागि प्रदेश सरकार, स्थानीय तह र करुणा फाउण्डेसन नेपालको त्रिपक्षीय लागत सहभागितामा आगामी मङ्सिर २ गतेदेखि पुसको दोस्रो हप्तासम्म उक्त कार्यक्रम हुने भएको हो । झापा, ताप्लेजुङ र तेह्रथुमका स्थानीय तहको प्रत्येक वडामा अपाङ्गता रोकथाम तथा पुनःस्थापनाका लागि शिविर आयोजना गर्ने तयारी भइरहेको करुणा फाउण्डेसन नेपाल कोशीका कार्यक्रम संयोजक कमल कोइरालाले बताउनुभयो । 

उहाँले कार्यक्रममा नवजात शिशु, १० वर्षमुनिका बालबालिकाको परिचयपत्र वितरण, स्वास्थ्य परीक्षण, श्रवणयन्त्र, ह्वीलचियर, कृत्रिम हातखुट्टाको नापजाँच, विद्यालय भर्नालगायत सेवा उपलब्ध हुने जानकारी दिनुभयो । २०७८ को जनगणनाअनुसार झापामा २३ हजार नौ सय ८८ अपाङ्गता भएका व्यक्ति छन् । जसमा नौ हजार पाँच सय ५९ जनाले परिचयपत्र लिइसकेका छन् ।

संयोजक कोइरालाले झापाका पालिकामा १३ हजार तीन सय ६४ जनाको लगत सङ्कलन गरिसकेको र उनीहरूलाई सेवा प्रदान गर्ने तयारी भइरहेको बताउनुभयो । अर्जुनधारामा एक हजार दुई सय ९०, कनकाईमा सात सय ३८, गौरादहमा छ सय ६३, दमकमा एक हजार ७९, बिर्तामोडमा सात सय ८९, भद्रपुरमा नौ सय १३, मेचीनगरमा एक हजार सात सय ४४ र शिवसताक्षी नगरपालिकामा आठ सय तीन जना अपाङ्गता भएका व्यक्तिको तथ्याङ्क सङ्कलन भइसकेको छ ।

यसैगरी, कमलमा आठ सय ८९, कचनकवलमा नौ सय छ, गौरीगञ्जमा छ सय ३९, झापामा पाँच सय २२, बाह्रदशीमा आठ सय ९९, बुद्वशान्तिमा आठ सय ७६ र हल्दिबारी गाउँपालिकामा छ सय १३ जना अपाङ्गता भएका व्यक्तिको तथ्याङ्क सङ्कलन गरिएको छ । आगामी मङ्सिर २ देखि ८ गतेसम्म बाह्रदशी गाउँपालिका र ३ देखि १२ गतेसम्म भद्रपुर नगरपालिकामा शिविर हुने मिति तय भइसकेको छ ।

कार्यक्रमबाट नवविवाहित दम्पती, नवजात शिशु, १० वर्षमुनिका बालबालिका, अपाङ्गता भएका बालबालिका, वयस्क, ज्येष्ठ नागरिक र उनीहरूका परिवारका सदस्य, अपाङ्गता भएका व्यक्तिका संस्था र समूह लाभान्वित हुने भएका छन् । कार्यक्रम संयोजक कोइरालाले तीनवटा संस्थाबीच कार्यक्रम सञ्चालनका लागि रु १२ करोडभन्दा बढीको लागत साझेदारी रहने जानकारी दिनुभयो ।

–रासस