धान फल्ने खेतमा सुन्तला : वर्षकै १४ लाख आम्दानी

आफ्नै खबर

८ मंसिर २०८१ शनिबार (१ हप्ता अघि)

पाठक संख्या ४३

म्याग्दी/  १३ वर्षअघि अंश वापत पाएको १० रोपनी धान फल्ने खेतमा सुन्तलाका बिरुवा रोप्दा बेनी नगरपालिका–४ सुर्केमेलाका डिलबहादुर केसीलाई धेरैले गाली गरेका थिए । केसिको ‘मुर्खता’ प्रति गाउँले हाँसेका थिए ।   

‘बुवाले अंश दिएको १० रोपनी खेतमा सुन्तलाका बिरुवा लगाउँदा आफन्त र छिमेकीहरुले धान फल्ने खेतमा काँडा रोपेर छोराछोरी भोकै पार्ने भईस भनेर गाली गरेका थिए’, ४४ वर्षीय केसीले भन्नुभयो, ‘त्यसबेला गाली गर्नेहरु अहिले मेरो आम्दानी गरेको देखेर दंग परेका छन् ।’ 

बीस रोपनी पाखोबारी र खेतमा चार सय ५० बोट सुन्तला लगाएका केसीले यसपाली १० लाख रुपैयाँको सुन्तला बिक्री भइसकेको र थप चार लाख रुपैयाँको सुन्तला बिक्री गर्न बाँकी रहेको बताउनुभयो । हाल दुई साय ५० बोट सुन्तलाले उत्पादन दिने गरेको छ । 

पाँच वर्ष युएई र मलेसियामा काम गरेर फर्किएका केसीले सुन्तला खेतीका साथै के.सी. मौरीपालन स्रोत केन्द्र सञ्चालन गरेर वार्षिक दुई सय देखि तीन सय मौरी सहितको घार बिक्री गर्नुहुन्छ । सुन्तला र मौरीको आम्दानीले बागलुङमा पक्की घर बनाएका केसीले दुई छोरीलाई उच्च शिक्षा पढाउनुभयो । एक छोरा र छोरी निजी विद्यालयमा मावि तहको अध्ययन गर्दैछन् । 

‘विदेशबाट फर्केपछि माछा, भैसी र बंगुर पालेँ’, उहाँले भन्नुभयो, ‘माछा र बंगुर मरेर ठूलो नोक्सान भयो । भैसीबाट आम्दानी राम्रै भएपनि धेरै दुःख र झञ्जट भयो । सुन्तला र मौरी ब्यवसायबाट सफलता मिल्यो ।’ कुनै पनि काममा निरन्तरको प्रयासपछि सफलता प्राप्त हुने केसीको अनुभव छ । 

मौरी सहितको प्रतिघार १० हजार रुपैयाँका दरले बिक्री हुन्छ । म्याग्दीका साथै पर्वत, बागलुङ, कास्कीलगायत जिल्लाबाट मौरीको माग आउने गरेको छ । ब्यापारीले अग्रिम पैसा दिएर सुन्तला किनेर लैजाने गरेका छन् । सुन्तला खेती र मौरीपालनबाट केसीको जिवनशैलीमा परिवर्तन आएको छ । छोराछोरी र श्रीमतिले केसीलाई कृषि फार्ममा साथ दिएका छन् ।

केसीको सिको गरेर सुर्केमेलाका १६ कृषकहरुले ब्यवसायिक सुन्तला खेती गरेका छन् । सुर्केमेलामा सुन्तला खेती गर्ने पहिलो कृषक केसी हुनुहुन्छ । चार सय बोट सुन्तला लगाएका सुर्केमेलाका धनराज पुनले अन्नबालीको तुलनामा धेरै गुणा बढी आम्दानी भएको बताउनुभयो । 

बर्षमा आठ÷दश मुरी धान फल्ने खेतमा लगाएको सुन्तलामा १० लाख रुपैयाँभन्दा बढी कमाई हुने उहाँले बताउनुभयो । सिँचाई सुविधा भएको सुर्केमेलाको भूगोल र हावापानी सुन्तला खेतीका लागि उपयुक्त मानिन्छ । रसिलो, स्वादिलो सुन्तला काठमाडौ, पोखरा, बेनीका ब्यापारीले किनेर लैजान्छन् । सुर्केमेलाका कृषकलाई कृषि ज्ञान केन्द्र र बेनी नगरपालिकाको कार्यालयले सघाएका छन् ।

–रासस