इप्पानको रजत जयन्तीमा ऊर्जा विकास सम्बन्धी फोटो प्रदर्शनी 

आफ्नै खबर

४ माघ २०८१ शुक्रबार (६ महिना अघि)

पाठक संख्या ६६

काठमाडौं/   स्वतन्त्र ऊर्जा उत्पादकहरूको संस्था (इप्पान)को रजत जयन्तीको अवसरमा ऊर्जा विकासमा केन्द्रित फोटो प्रदर्शनी सम्पन्न भएको छ । इप्पान र फोटो पत्रकारहरूको संस्था (पीजे क्लब)को सहकार्यमा आयोजित फोटो प्रतियोगिताबाट छानिएका ५० उत्कृष्ट तस्बिर प्रदर्शनीमा समावेश गरिएका थिए ।

प्रधानमन्त्री केपी शर्मा ओलीले प्रदर्शनीको अवलोकन गर्दै प्रतियोगिता विजेताको घोषणा गर्नुभयो । ऊर्जा मन्त्री दीपक खड्का र नेपाल विद्युत प्राधिकरणका प्रबन्ध निर्देशक कुलमान घिसिङले पनि प्रदर्शनी अवलोकन गरेका थिए । 

प्रतियोगितामा सुरविन्द्रकुमार पुनले खिचेको तस्बिरले प्रथम स्थान प्राप्त गर्यो र किरण पाण्डेले दोस्रो स्थान हात पार्नुभयो भने अनिता कार्की तेस्रो हुनुभयो । विजेताहरुलाई क्रमशः ३०, २० र १० हजार रुपैयाँ नगद पुरस्कार प्रदान गरिएको छ ।

प्रदर्शनीलाई व्यवस्थित रूपमा दुई खण्डमा विभाजन गरिएको पीजे क्लबका अध्यक्ष द्वारिका काफ्लेले जानकारी दिनुभयो । पहिलो खण्डमा स्वतन्त्र व्यक्ति तथा कम्पनीहरूले पठाएका तस्बिरलाई इप्पान र पीजे क्लबका प्रतिनिधि सहितको स्वतन्त्र निर्णायक मण्डलले छनोट गरेर राखिएको थियो । 

दोस्रो खण्डमा इप्पानसँग आबद्ध सदस्य कम्पनीहरूले प्रवर्द्धन गरेका आयोजना तथा परियोजनाका तस्बिर समेटिएका थिए । ऊर्जा विकासलाई कलात्मक दृष्टिकोणले प्रस्तुत गर्न यो प्रदर्शनीले महत्वपूर्ण भूमिका खेलेको आयोजकको दावी छ । 

इप्पानका सदस्य कम्पनीहरूको योगदान र स्वतन्त्र फोटोग्राफरहरूको सृजनशीलतालाई एकै थलोमा समेटेर ऊर्जा विकासका विविध आयाम उजागर गरिएको थियो ।