विपन्न समुदायका लागि सुरक्षित आवास निर्माण

आफ्नै खबर

२९ माघ २०८१ मंगलबार (३ महिना अघि)

पाठक संख्या ५५

कैलाली/  घोडाघोडी नगरपालिकामा विपन्न परिवारका लागि सुरक्षित आवास निर्माण गरेर सीमान्तकृत समुदायलाई हस्तान्तरण गरिएका छन् । घोडाघोडीको वडा नं ४ सिम्थरीमा ६ र वडा नं ९ गोदनीमा ६ वटा आवास निर्माण गरिएका हुन् । 

नगरप्रमुख खडकबहादुर रावतले नव निर्मित घर ती समुदायलाई हस्तान्तरण गर्दै पालिकाभित्रका सबै वडामा सीमान्तकृत वर्गलाई सुरक्षित आवास बनाउने योजना रहेको जानकारी दिनुभयो । ह्याबिट्याट फर ह्युमिनिटी, राष्ट्रिय दलित नेटवर्क र घोडाघोडी नगरपालिकाको लागत साझेदारीमा उक्त घर निर्माण गरिएका हुन् । 

सुरक्षित आवासमा दुईवटा पक्की कोठा र एक शौचालय रहेको छ ।  घोडाघोडी नगरपालिकाको ४२ लाख रुपैयाँ, ह्याबिट्याट फर ह्युमिनिटी, राष्ट्रिय दलित नेटवर्क नेपालको २४ लाख रुपैयाँ र जनश्रमदान नौ लाख पाँच हजार पाँच सय दुई रुपैयाँ लागत साझेदारीमा सुरक्षित आवास निर्माण गरिएको हो ।

वडाहरूको सिफारिसमा आवासविहीन सीमान्तकृत वर्गलाई लागत साझेदारीमा घोडाघोडीले सुरक्षित आवास निर्माण गरिदिएको हो । यसअघि पालिकाले वडा नं ३ सृष्टिनगर मुक्त कमैया बस्तीका नागरिकलाई १२ सुरक्षित आवास हस्तान्तरण गरिसकेको छ ।

–रासस