‘विदेशभन्दा यहिँ पशु र मौरीपालन ठिक’

आफ्नै खबर

    (२ महिना अघि)

पाठक संख्या ४९

सुनसरी/  करिब एक दशक लामो वैदेशिक जीवन बिताएपछि स्वदेश फर्किएर व्यावसायिक पशुपालन र मौरीपालनमा रमाइरहनुभएका इटहरीका किसान मनराज यहाँको आम्दानीमा सन्तुष्ट हुनुहुन्छ । इटहरी उपमहानगरपालिका–१९ का मनराज पुरी आठ वर्ष साउदी र मलेसियामा काम गरेर स्वदेश फर्कनुभएको हो । 

उहाँले सानो लगानीबाट  पशुपालन र मौरीपालनमा गर्नुभएको थियो । अहिले त्यही व्यवसाय ठूलो आम्दानीको स्रोत बनेको उहाँ बताउनुहुन्छ ।

१७ वर्षको उमेरमा बाबुआमा गुमाएको सुनाउँदै मनराजले भन्नुभयो, ‘विदेशमा गएर दुःख र मेहेनत गरेर कमाएको थोरै पैसा आफ्नो देशमा लगानी गरेर केही व्यवसाय सुरू गराँै भन्ने सोच राखें, अरू बिजनेस गर्ने सोच भए पनि तरिका खासै नभएका कारण पशुपालनमा लगानी गरेर सुरू गरेँ ।’

गाईबाख्राबाट व्यवसाय सुरू गर्नुभएका उहाँले पछिल्लो समय मौरीपालन सुरू गर्नुभएको छ । अहिले मौरीबाट राम्रो आम्दानी भइरहेको उहाँ बताउनुहुन्छ । 

‘यो व्यवसायले आफू आत्मनिर्भर बनेको जस्तो महसुस भएको छ । आफ्नो व्यवसायले दिने जति आनन्द अरूको नोकरी गर्दा पाइँदैन’, उहाँले भन्नुभयो, ‘अहिले यही व्यवसायबाट वार्षिक रूपमा आठदेखि नौ लाख रुपैयाँसम्म कमाइ हुने गरेको छ । घरव्यवहार सबै यही कमाइले पुगेको छ ।’

व्यावसाय सुरू गर्दा चुनौती र अवसर त हुन्छन् नै । गाईपालन गर्दा दूध उत्पादन गरी बिक्री गर्न गाह्रो पो होला बजार नपाइएला भन्ने चिन्ता हटेर निकै सहज भएको उहाँको बुझाइ छ । मनराज भन्नुहुन्छ, ‘अहिले दैनिक रूपमा ४० देखि ५० लिटरसम्म दूध आफैँले स्थानीय बजार होटल र डेरीमा बिक्रीका लागि पुर्याउने काम गरिरहेको छु ।’ 

उहाँले अगाडि भन्नुभयो, ‘विदेश गएर अर्काकोमा दुःख गर्नुभन्दा आफ्नै देशमा सानोतिनो लगानी गरेर भए पनि राम्रो आम्दानी गर्न सकिन्छ । गाउँमै रोजगारीको सिर्जना पनि हुने अरूलाई पनि रोजगार दिन सकिने आफू लागि पनि रोजगार हुने ।’ 

मनराजले पशुपालन व्यवसाय सुरू गरेसँगै गाईफार्ममा दुई जना कामदार राख्नुभएको थियो । गाउँमै रोजगार दिन पाउँदा आफूलाई गर्व महसुस भएको उहाँ बताउनुहुन्छ । 

‘आठ वर्षदेखि उहाँहरूले काम गर्दै आउनुभएको छ । महिनामा २२ हजार रुपैयाँ तलब दिने गरेको थिएँ’, पुरीले भन्नुभयो, ‘पछिल्लो केही महिनाअघि उहाँहरूले काम छाडेपछि अहिले हामी आफैँ परिवार मिलेर व्यवसाय सञ्चालन गरिरहेका छौँ ।’

‘गाई र खसीबाख्रालाई दिने घासको खासै दुःख छैन । गाईलाई दिने घाँस आफ्नै बारीमा रोपेका छौँ’, उहाँले भन्नुभयो, ‘एक बिघा बढी जग्गामा धानखेती गर्ने गरेका छाैँ । त्यहाँबाट गाईका लागि पराल घाँस आउँछ । घाँस बाहिरबाट खासै खरिद गर्न परेको छैन ।’

उहाँका अनुसार खसीबाख्राचाहिँ अझ केही चरन र डालेघाँस बढाएर पाल्न सकियो भने सम्भावना राम्रो छ । 

मनराजले मौरीपालनमा राम्रो आम्दानी हुने देखेपछि एक वर्ष अगाडि चार घार मौरी किनेर सुरू गर्नुभएको छ । अहिले उहाँसँग ४० घार बढी मौरी रहेका छन् । 

उहाँले भन्नुभयो, ‘सुरूमा हेर्दा मौरीबाट के आम्दानी होला र जस्तो लाग्ने तर विस्तारै घार बढाउँदै लगेँ र यहाँबाट राम्रो आम्दानीको सम्भावना देखेपछि अहिले मौरीपालनलाई अझ बढी प्राथमिकता दिएर सञ्चालन गरिरहेको छु ।’

‘मौरीपालन अरूले गरेको देखेर सुरू गरेको हुँ । सम्भावना पनि राम्रो देखेको छु’, उहाँले भन्नुभयो, ‘फूलको सिजनमा भने धेरै उत्पादन गर्न सकिन्छ । २२ देखि ३० दिनमा मह काढ्न मिल्छ । उत्पादन पनि धेरै हुन्छ ।’

फूल फुल्ने सिजन र स्रोत नहुँदा भने कहिले तीन महिनासम्म समय लाग्ने गरेको उहाँ सुनाउनुहुन्छ । 

मनराजले मौरीको घार गोटाको १४ हजार रुपैयाँमा खरिद गरेर पालिरहनुभएको छ । एउटा घारमा एक पटक मह काढ्दा ६ केजीसम्म उत्पादन हुने गरेको उहाँले बताउनुभयो । उहाँले भन्नुभयो, ‘इटहरीकै स्थानीय बजारमा बिक्री गर्दै आएको छु । बजारको चिन्ता छैन ।’

किसानले गाउँमै मौरीपालन र परामर्श तालिम लिन पाए भने मौरीपालनबाट राम्रै आम्दानी गर्न सकिन्छ । गाउँमा नै उत्पादन गरिएको अग्र्यानिक मह बिक्री गरी राम्रो मूल्य लिन सकिने उहाँको अनुभव छ । अहिले उहाँले मह प्रतिकेजि सात सय ५० देखि एक हजार रुपैयाँसम्ममा घरबाट नै बिक्री गर्ने गरेको बताउनुभयो । 

मौरीपालन कम लगानीबाट पनि सुरू गर्न सकिन्छ । लगानी गरेर यसलाई राम्रो दिगो आम्दानीका रूपमा गर्न सकिने व्यवसायका रूपमा लिन सकिन्छ । राम्रो व्यवस्थापन बजारको अध्ययनसँगै आधुनिक प्रविधिसँगै सरकारबाट राम्रो अनुदान पाउनसके मौरीपालनबाट पनि आम्दानीको सम्भावना बढ्दै जाने उहाँको भनाइ छ ।

–रासस