गोरु पाल्ने किसानलाई पालिकाको अनुदान

आफ्नै खबर

१ चैत २०८१ शुक्रबार (४ महिना अघि)

पाठक संख्या १२८

गुल्मी/  चन्द्रकोट गाउँपालिकाले हल गोरु पाल्ने किसानलाई अनुदान दिनेभएको छ । गाउँपालिकाको चालु आर्थिक वर्षको नीति तथा कार्यक्रमअनुसार पालिकाभित्र हल गोरु पाल्ने किसानलाई प्रतिकिसान तीन हजार रुपैयाँका दरले अनुदान दिने जनाएको छ । 

अनुदान दिनका लागि पालिकाले दुई सय ५८ किसान छनोट गरेको छ । जसअनुसार वडा नं. १ मा २४, वडा नं. २ मा ३४, वडा नं. ३ मा नौ, वडा नं. ४ मा ३९ तथा वडा नं. ५ मा ६९ जना छन् । 

त्यसैगरी वडा नं. ६ मा ३१, वडा नं. ७ मा १४ र वडा नं. ८ मा ३८ जना किसान छनोट भएको गाउँपालिकाका सूचना अधिकारी शिव ज्ञवालीले जानकारी दिनुभयो । 

अनुदानका लागि पालिकाले आवेदन खुलाएको थियो । जसमध्ये पालिकाले अनुगमन गरेपश्चात् कम्तीमा दुई वटा अर्थात् एक हल गोरु पाल्ने किसानलाई छनोट गरेको ज्ञवालीले जानकारी दिनुभयो । अनुदानको रकम सम्बन्धित वडाबाट वितरण गरिनेछ । 

गाउँपालिका अध्यक्ष युवराज केसीले विविधतायुक्त कृषि प्रणालीलाई सहयोग गर्न अनुदान दिन थालिएको बताउनुभयो । ‘समथर र ठूला खालका जग्गामा यन्त्र उपकरण दिइएको छ’, उहाँले भन्नुभयो, ‘भिराला जग्गामा गोरुकै काम हुने भएकाले अनुदान दिन थालेका हौँ ।’

–रासस