‘एक वडा–एक कृषि उत्पादन कार्यक्रम’ कार्यान्वयन

आफ्नै खबर

    (४ हप्ता अघि)

पाठक संख्या ६६

काभ्रेपलाञ्चोक/  बागमती प्रदेश सरकार कृषि तथा पशुपक्षी विकास मन्त्रालय, कृषि विकास निर्देशनालयद्वारा सञ्चालित कृषि उत्पादनमा स्वनिर्भर वडा निर्माण अभियानअन्तरगत समुदायमा आधारित ‘एक वडा–एक कृषि उत्पादन कार्यक्रम’ कार्यान्वयन भइरहेको छ । 

जिल्ला कृषि विकास कार्यालय काभ्रेपलाञ्चोकमार्फत चालु आर्थिक वर्षमा ११ कार्यक्रम रहेकोमा हालसम्म सातवटा सम्झौता भई काम थालनी भएको छ । बाँकी कार्यक्रम कार्यान्वयनको चरणमा रहेको कार्यालयले जनाएको छ । 

उक्त कार्यक्रमअन्तर्गत जिल्लाको महाभारत गाउँपालिका–५ र खानीखोला–२ मा कफीखेती कार्यक्रम लागू भइसकेको छभने बेथानचोक गाउँपालिका–२ मा तरकारीखेती यसै हप्ता सम्झौता गरिएको छ । वडास्तरमा सञ्चालित यस कार्यक्रममा कृषि कार्यालयको कार्यालय प्रमुख कुलप्रसाद दवाडीले सम्झौता गर्नुभएको छभने स्थानीय तहको तर्फबाट जन्रतिनिधिले हस्ताक्षर गर्नुभएको छ । 

प्रदेश सरकारले कार्यालयमार्फत पहिलो पटकका लागि बेथानचोक–२ का लागि ६६ लाख ९९ हजार रुपैयाँबराबरको कार्यक्रम सञ्चालन गर्न सम्झौता भएको हो । गाउँपालिकाले २० प्रतिशत अर्थात् १३ लाख ३३ हजार रुपैयाँ तथा २० प्रतिशत अर्थात् १३ लाख ६९ हजार रुपैयाँ समूहले योगदान गर्ने प्रतिबद्धता जनाइएको छ । 

गाउँपालिकाले ब्यहोर्ने रकम बापतको १३ लाख ३३ हजार रुपैयाँ कोष तथा लेखा नियन्त्रण कार्यालयमा जम्मा भइसकेको जनाइएको छ । कार्यविधिअनुसार बेथानचोकमा महाभारत किसान समूहसँग अधिकतम् पाँच वर्षसम्म कार्यक्रम सञ्चालन गर्न सकिने उल्लेख गरिएको छ ।

यसका लागि समूहले पाँच वर्षसम्मको कार्यक्रम र कार्ययोजना तयार गरिसकेको गाउँपालिका अध्यक्ष भगवान घिमिरेले बताउनुभयो । 

हाललाई तरकारी उत्पादन प्रविधिमा आधारित क्रियाकलाप बाँस र फलामका प्लाष्टिक हाउस निर्माण, उन्नत बीउबिजन, मलखाद, स्थलगत तालिमलगायतका कार्य समावेश रहेको छभने आउँदा वर्षमा भण्डारणलगायतका बजारीकरणका थप क्रियाकलापमा जोड दिइने छ ।

कार्यालयका अनुसार अन्य दुई स्थानीय तह मध्ये पनौती नगरपालिका–५ तथा भुम्लु गाउँपालिकाको १ नं. वडामा उक्त कार्यक्रम लागू गरिएको छ । कार्यक्रम अनुसार पाँच वटा वडामा ६ सय रोपनी जमिनमा तरकारी, कफी तथा किबी उत्पादनको काम गरिएको छ । 

कृषि विकास कार्यालय, स्थानीय तह तथा लाभग्राही समुदाय एवं सहकारीबीच त्रीपक्षीय सम्झौता गरेर कार्यक्रमको थालनी सुरु गरिएको हो । 

पनौती र बेथानचोक तरकारी, महाभारत र खानीखोला कफी तथा भुम्लु किबी उत्पादनका लागि छनोट भएका हुन् । कार्यक्रम सञ्चालनार्थ स्थानीय सहकारी संस्था एवं समुदायको समूहसँग सम्झौता गरिने छ । 

दवाडीले भन्नुभयो, ‘समुदाय तथा सहकारी छनोट गरी सम्झौताकार्य भइरहेका छन् । मौसमी तथा बेमौसमी तरकारी छनोट गरी लगत्तै उत्पादन कार्यतर्फ लाग्नेछौँ ।’ उहाँका अनुसार कार्यक्रम लागू गर्न स्थानीय तहका जनप्रतिनिधि तथा समुदायबीच छलफल सम्पन्न गरिएका छन् । कार्यक्रमअन्तरगत एउटा वडाका लागि करिव ६७ लाख रुपैयाँ उत्पादनकार्यमा लगानी भएक छ ।  

बागमती प्रदेश सरकारले चालु आवमा कृषि उत्पादनलाई प्राथमिकता दिँदै ‘एक वडा–एक कृषि कार्यक्रम’ अन्तरगत पाँच वर्षका लागि पशुपक्षी तथा मत्स्यजन्य उत्पादन कार्यक्रम सञ्चालनमा ल्याएको हो । 

साझेदारीमा सञ्चालन गरिने उक्त कार्यक्रम अन्तरगत कार्यालयले ६० प्रतिशत, स्थानीय तहले २० प्रतिशत तथा समुदाय वा सहकारीले २० प्रतिशत लगानी गर्ने छ । 

–रासस