लोभलाग्दो च्याउखेती

आफ्नै खबर

    (४ हप्ता अघि)

पाठक संख्या १०३

पर्वत/  जलजला गाउँपालिका–८ फर्सेकी सावित्री खत्री व्यावसायिक च्याउखेतीबाट मनग्य आम्दानी गर्न सफल हुनुभएको छ । कृषि पेसाबाट गाउँमै केही गर्न सकिन्छ भनेर विगत ११ वर्षदेखि व्यावसायिक कृषिखेतीमा सक्रिय खत्रीले च्याउ र तरकारीखेतीबाट बर्सेनि १२ लाख रुपैयाँभन्दा बढी आम्दानी गर्न थाल्नुभएको छ । 

चारवटा गुम्बज टनेलमा कन्ये र गोब्रे च्याउखेती उत्पादन गरी छिमेकी जिल्ला बागलुङ, म्याग्दी र पर्वतको कुश्मा बजारमा खपत गर्ने गरेको अगुवा कृषक खत्रीको भनाइ छ । यस वर्ष च्याउबाट मात्रै रु सात लाखभन्दा बढी आम्दानी भएको उहाँले बताउनुभयो । 

कृषक खत्रीले भन्नुभयो, ‘च्याउखेतीबाट हुने आम्दानीबाट सन्तुष्ट छु । उत्पादित च्याउको बिक्रीका लागि कुनै समस्या छैन ।’ गोब्रे च्याउको प्रतिकिलो पाँच सय रुपैयाँ र कन्ये दुई सय रुपैयाँ किलोमा बिक्री गर्ने गरेका उहाँले गोब्रे च्याउबाट यस वर्ष पाँच लाख र कन्ये च्याउबाट दुई लाख रुपैयाँ आम्दानी भएको बताउनुभयो । 

कच्चापदार्थसहितका सामग्रीसमेत तयार गर्ने गर्नुभएकी कृषक खत्रीले सात रोपनी जमिनमा उत्पादन हुने अन्य तरकारी पाँच लाख रुपैयाँको बिक्री गर्नुहुन्छ । च्याउबाहेक मौसमअनुसार काँक्रो, घिराँैला, बोडी, सिमी, करेला, भन्टा, खुर्सानी, धनियाँ, गाजरलगायतका तरकारी उत्पादन गर्दै आएको बताउनुभयो । 

तीनवटै जिल्लाका सदरमुकाम नजिकै रहेको र कालीगण्डकी करिडोरअन्तर्गत मालढुङ्गा–बेनी सडक नजिकै रहेकाले उत्पादित च्याउ र तरकारी बजारीकरणमा समस्या नरहेको उहाँले बताउनुभयो । खत्रीले यस वर्ष उच्च प्रविधिको टनेल थपेर बाह्रै महिना च्याउखेती गर्न थाल्नुभएको छ । 

उहाँले वातानूकुलित टनेलमा जाडो तथा गर्मी दुवै याममा च्याउ उत्पादन हुने बताउनुभयो । अब च्याउखेतीबाट निरन्तर आम्दानी हुने उहाँले बताउनुभयो । 

सामाजिक एवं राजनीतिक रुपमा सक्रिय रहनुभएकी खत्रीले राम्रो उत्पादन दिने र श्रमिक पनि कम लाग्ने हुँदा च्याउखेतीलाई विस्तार गर्दै जानुभएको छ । वैदेशिक रोजगारीबाट फर्किनुभएका श्रीमान् भीमबहादुर केसीले च्याउ र अन्य तरकारीखेतीको उत्पादन तथा बजारीकरणमा सघाइरहनुभएको छ । 

अहिले दम्पतीका अलावा समय–समयमा ज्यालादारी मजदुर खोजेर तरकारीखेती गर्ने गरेको उहाँको भनाइ छ । 

खेती गर्नलाई धेरै ठूलो ठाउँ, समय पनि नचाहिने र बेच्नलाई सजिलो भएकाले यसप्रति श्रीमान्ले विदेश नगई सघाउन थालेको खत्रीले बताउनुभयो । मेहनत गर्ने हो श्रीमान्ले विदेशमा कमाउने पैसा दुवै मिलेर यहीँ दुःख गरी कमाउन सकिने खत्रीको अनुभव छ । 

खत्रीले च्याउखेतीबाट भएको कमाईले छोरीलाई उच्च शिक्षाका लागि विदेश पठाउन सफल हुनुभएको छभने छोरालाई समेत निजी विद्यालयमा पढाउनुभएको छ । यसका अलावा बचत गर्न सफल भएको उहाँले बताउनुभयो । मेहनत र परिश्रम गर्ने हो भने पैसा कमाउन विदेश जान पर्दो रहेनछ भन्ने आफ्नो अनुभवले देखाएको उहाँले बताउनुभयो । 

पछिल्लो समय गाउँपालिकामा व्यावसायिक रुपमा लाग्ने कृषकको आकर्षण बढेको गाउँपालिकाका अध्यक्ष राजुप्रसाद आचार्यले बताउनुभयो । आचार्यले भन्नुभयो, ‘गाउँपालिकाले पनि प्रोत्साहन गरिरहेको छ । अबका दिनमा च्याउखेतीमा अनुदान समेत बढाउँछौँ ।’

च्याउ एक बहुउपयोगी खाद्य पदार्थ हो । च्याउमा तरकारी तथा मासुमा पाइने सबै प्रकारका प्रोटिन तत्व पाइने र सजिलैसँग पचाउन सकिने भएकाले बच्चादेखि वृद्धवृद्धाका लागि अति उपयोगी छ । च्याउमा पानीको मात्रा ९० प्रतिशत पाइने हुनाले यो एकदम महत्वपूर्ण मानिन्छ । 

–रासस