एकै जिल्लामा तीन हजार मेट्रिक टन भन्दा वढी तोरी उत्पादन

आफ्नै खबर

४ बैशाख २०८२ बिहिबार (३ हप्ता अघि)

पाठक संख्या ५९

नवलपरासी पूर्व/  पूर्व नवलपरासी (बर्दघाट सुस्तापूर्व)मा यस वर्ष तीन हजार ३४ मेट्रिक टन तोरी उत्पादन भएको छ । कृषि ज्ञान केन्द्रका अनुसार जिल्लामा यस वर्ष दुई हजार चार सय ६९ हेक्टर क्षेत्रफलमा तोरीखेती गरिएकामा उक्त परिमाणमा उत्पादन भएको हो । 

केन्द्र प्रमुख कुलप्रसाद तिवारीले उत्पादन भएको तेलहन बालीमध्ये तोरी एक हजार तीन सय १९ र सर्सियु एक हजार सात सय १५ मेट्रिक टन रहेको बताउनुभयो । 

उहाँका अनुसार आर्थिक वर्ष २०८०/८१ मा यहाँ दुई हजार चार सय ४३ हेक्टर क्षेत्रफलमा तोरीखेती गर्दा दुई हजार नौ सय ७१ मेट्रिक टन र २०७९/८० मा दुई हजार चार सय ३३ हेक्टर क्षेत्रफलमा खेती गरिँदा दुई हजार नौ सय २० मेट्रिक टन उत्पादन भएको थियो ।

आव २०८०/८१ भन्दा यस वर्ष तोरीखेती गर्ने क्षेत्रफल २६ हेक्टर र उत्पादन ६३ मेट्रिक टनले वृद्धि भएको कृषि ज्ञान केन्द्रका कृषि बालीविज्ञ सञ्जय ढकालले बताउनुभयो । उहाँले भन्नुभयो, ‘विगत तीन वर्षको तथ्याङ्कलाई हेर्दा तोरीखेतीको क्षेत्रफलसँगै उत्पादन पनि बढिरहेको छ । जिल्लामा तोरीखेतीप्रति कृषकको आकर्षण बढ्दै गएको छ ।’ 

ज्ञान केन्द्रका सूचना अधिकारी विश्वास काफ्ले अन्य बालीको तुलनामा तोरीखेतीबाट बढी फाइदा हुने तथा बजारबाट किनिएको तेल प्रयोग गर्नुभन्दा आफैँले उत्पादन गर्नु राम्रो हुने बुझाईले किसानहरू तोरीखेतीमा आकर्षित हुँदै गएका बताउनुहुन्छ । यहाँको गैँडाकोट, देवचुली, कावासोती र मध्यविन्दु नगरपालिका तथा विनयी त्रिवेणी गाउँपालिका क्षेत्रमा बढी मात्रामा तोरीखेती गरिन्छ ।

–रासस