सीमा क्षेत्रका स्थानीयले पाए चीन प्रवेश पास

आफ्नै खबर

१३ बैशाख २०८२ शनिबार (१ हप्ता अघि)

पाठक संख्या ४६

हुम्ला/  व्यापार व्यवसायका निम्ति चीनको स्वशासित क्षेत्र तिब्बताको ताक्लाकोट जान चाहनेहरुलाई जिल्ला प्रशासन कार्यालयले उत्तरी नाम्खा गाउँपालिकाको सीमावर्ती क्षेत्रमा पुगेर अस्थायी प्रवेश पास वितरण गरेको छ । 

पुराङ काउन्टीको ताक्लाकोटबाट तिब्बतका विभिन्न स्थानमा आवतजावत गर्न तुम्कोट, याल्वाङ, हिल्सा, यारीलगायत क्षेत्रमा पुगेर तीन सय ७४ जनालाई नयाँ अस्थायी प्रवेश पास र पुरानो नवीकरण गरिएको प्रमुख जिल्ला अधिकारी नारायण पाण्डेयले बताउनुभयो । 

हालसम्म जिल्ला प्रशासन कार्यालयबाट सात हजार पाँच सय ४५ जनाले ताक्लाकोट आवतजावत गर्न प्रवेश पास लिएका उहाँले जानकारी दिनुभयो । 

हिउँदयामको हिउँले यारी नाकाको ठाडो ढुङ्गा क्षेत्रको सडक नखुलेका कारण दुई घण्टाको ओरालो पैदल हिँडेर हिल्सा पुगेको प्रमुख जिल्ला अधिकारी पाण्डेयले बताउनुभयो । गाडी यारीसम्म मात्रै जाने भएकाले हिल्सा पुग्न ओरालो दुई घण्टा र हिल्साबाट उकालो यारी पुग्न चार घण्टाको पैदलमा भएर नागरिकको सेवा गरेको उहाँले बताउनुभयो । 

सीमावर्ती पास वितरणका क्रममा चीनको ताक्लाकोटबाट नवीकरणका लागि बाटोमा आफूलाई पछ्याउँदै आएका दुई जनालाई वितरण गरेको प्रमुख जिल्ला अधिकारी पाण्डेयले बताउनुभयो ।

–रासस