नेपालमै सुरुभयो कृषिमा ‘ड्रोन’को प्रयोग

आफ्नै खबर

१६ बैशाख २०८२ मंगलबार (७ दिन अघि)

पाठक संख्या ८२

कञ्चनपुर/  बेलौरी नगरपालिका–६ का कृषक आसरेराम वडायक १० वर्षअघि वैदेशिक रोजगारीमा जाने योजनाका साथ काठमाडौँ पुग्नुभएको थियो । 

काठमाडौँको एक ‘पोलिहाउस’मा टमाटरखेती देखेपछि उहाँ स्वदेशमै खेती गर्ने योजना बनाएर फर्किनुभयो । काठमाडौँबाट टमाटरको बीउ लिएर कञ्चनपुर फर्किनुभएका उहाँले त्यसयता विदेश जाने योजना बनाउनुभएको छैन । 

‘काठमाडौँबाट फर्किएपछि सुरुमा आधा कट्ठा जमिनमा तीनवटा पोलिहाउस बनाएर टमाटरखेती गरेँ’, वडायकले विगत सम्झँदै भन्नुभयो, ‘खेतीबाट फाइदा भएन, त्यसपछि तालिम लिएर खेती गर्छु भनेर भारतको पन्तनगर गएर दुई दिनको तालिम लिएँ ।’ 

तालिमपछि खेतीमा लाग्नुभएका वडायकले खेतीबाटै आम्दानी गरेर एक करोड रुपैयाँभन्दा बढीको कृषियन्त्र जोड्नुभएको छ । उहाँ हाल वार्षिक २६ लाख रुपैयाँसम्म आम्दानी गर्नुहुन्छ । उहाँले आफ्नो र भाडामा गरी नौ बिघा जग्गामा उखु, तोरी, मुसुरो र धानखेती जस्ता कृषि उपज उत्पादन गर्दै आउनुभएको छ । 

वडायकले भन्नुभयो, ‘खेती विस्तार गरेर वार्षिक एक करोड रुपैयाँसम्म कमाउने लक्ष्य राखेको छु ।’ उहाँले खेतीका लागि अत्याधुनिक कृषि उपकरण भित्र्याएर काम गरिरहेको जानकारी दिनुभयो । 

उहाँले भन्नुभयो, ‘ड्रोनको प्रयोग खेतीमा सहज हुने भएकाले गत वर्ष मात्रै दश लाख रुपैयाँमा ड्रोन खरिद गरेको छु ।’ उहाँले ड्रोनको प्रयोगबाट खेती गर्दा लागत कम हुनाका साथै उत्पादन समेत वृद्धि भएको बताउनुभयो ।

उहाँले भारतका विभिन्न शहरमा व्यावसायिक खेतीको तालिम लिनुभएको छ । वडायकले भन्नुभयो, ‘दुई वर्ष भारतको साझनपुरमा उखुखेतीसम्बन्धी तालिम लिएँ । महाराष्ट्रको साङ्लीमा व्यावसायिकखेतीको तालिम लिएर यहाँ आएपछि खेतीमा सजिलो भयो ।’ 

उहाँका अनुसार ड्रोनले मानिसले भन्दा धेरै छिटो काम गर्छ यसबाट बीउबिजन र विषादीलगायत आवश्यक कीटनाषक औषधि छर्कने गर्नुभएको छ । उहाँले भन्नुभयो, ‘ड्रोनको प्रयोगले विषादी छर्किंदा मानिसले भन्दा राम्रो छर्किने र किसानको स्वास्थ्यमा विषादीले पनि असर गर्दैन ।’ 

ड्रोनको प्रयोगले बीउबिजन र विषादी छर्किंदा थोरै लागतमा धेरै काम गर्न सकिने उहाँको भनाइ छ । उहाँलाई खेतीमा उहाँका परिवारका सदस्यहरुले समेत सहयोग गरेका छन् । उहाँले ‘सिजन’को बेला ३० देखि ४० जनालाई रोजगारी दिने गर्नुभएको छ ।

‘सामान्य किसानले एक बिघा जग्गामा दुईदेखि तीन लाख रुपैयाँसम्मको उत्पादन गर्ने गरेकामा मैले एक बिघामा करिब १४ लाख रुपैयाँसम्मको उत्पादन गर्ने लक्ष्य लिएको छु’, वडायकले भन्नुभयो, ‘प्राविधिक कुरामा मात्रै ध्यान दिन सके राम्रो उत्पादन हुन्छ ।’ उहाँले उत्पादन गर्न सके बजारको समस्या भने नरहेको बताउनुभयो ।

वडायक गत वर्ष सुदूरपश्चिम प्रदेश सरकारबाट प्रदेशकै सर्वोत्कृष्ट कृषकका रुपमा सम्मानित हुनुभएको थियो । भीमदत्त नगरपालिकाको उत्कृष्ट किसानबाट समेत उहाँ सम्मानित भइसक्नुभएको छ । 

‘अहिले खेती गर्न थप सजिलो होस् भनेर मोबाइल ‘एप लन्च’ गर्ने तयारीमा छु’, उहाँले भन्नुभयो, ‘त्यो एपबाट कुन समयमा मल हाल्ने, कुन रोगबाट कसरी बच्नेलगायतका पूर्वजानकारी पाउन सकिन्छ ।’ 

पछिल्लो समय कृषिमा प्रविधिको प्रयोग बढ्दै गएको छ । परम्परागत रुपमा गोरु र राँगा प्रयोग गरी जोत्ने ठाउँमा ट्याक्टर, मिनिटिलर, पावर टिलरको प्रयोग गर्न थालिएको छ भने बाली काट्न र पिस्न प्रविधिको प्रयोग भइरहेको छ । 

काट्नलाई ‘रिपर’, ‘बुस कटर’, ‘कम्बाइन हार्भेस्टर’लगायतका अत्याधुनिक उपकरणको प्रयोग बढ्दो छ । खेतबारी खनजोतमा सहज हुने भएपछि यान्त्रिकीकरणतर्फ किसान आकर्षित भएका हुन् ।

–रासस