मैनालीलाई पोषण पाण्डे तीर्थ सदन पुरस्कार

आफ्नै खबर

१ जेठ २०८२ बिहिबार (१ हप्ता अघि)

पाठक संख्या १६७

काठमाडौं/  नेपाली कथासाहित्यमा विशिष्ट स्थान बनाउनु भएका कथाकार पोषण पाण्डेको ३३ औं स्मृति दिवस पुरस्कार अर्पण कार्यक्रम सहित सम्पन्न गरिएको छ । 

उक्त अवसरमा पोषण पाण्डे तीर्थ सदनले काठमाडौँ धुम्बाराही निवासी साहित्यकार तथा समालोचक युवराज मैनालीलाई नेपाली साहित्यमा पुर्याउनुभएको योगदानको कदर गर्दै ‘पोषण पाण्डे तीर्थ सदन पुरस्कार २०८२’ ले सम्मानित गरिएको छ ।

सम्मानित मैनालीलाई दोसल्ला ओढाई सम्मानपत्रको साथमा संस्थाका अध्यक्ष विजय चालिसेबाट ५१ हजार रुपैयाँ नगद पुरस्कार अर्पण गरिएको थियो । 

विशिष्ट साहित्यकार, समालोचक, पत्रकार तथा परिवारजनको उपस्थिति रहेको उक्त समारोहमा पुरस्कार निर्णय कमिटीको संयोजक रहनुभएका साहित्यकार ठाकुर शर्मा भण्डारीले पुरस्कृत मैनालीको साहित्यप्रतिको लगनशीलताको कदर भएको र यस पुरस्कारले उहाँको लगनशीलतामा अझै हौसला थप्दै जाने विश्वास व्यक्त गर्नुभयो । 

पुरस्कृत साहित्यकार युबराज मैनालीले साहित्यकार पोषण पाण्डेको कवितामा देखिएको शिष्टता, सरलताका साथै कथामा देखिने यौन मनोविज्ञान माथि प्रकाश पार्नुभएको थियो ।

सदनको महासचिव रञ्जु पाण्डेले पोषण पाण्डे स्मृति दिवस तथा यस सम्मान तथा पुरस्कार कार्यक्रमले  पुस्ता पुस्तासम्म साहित्यकार पोषण पाण्डेलाई जीवन्त राखिरहन युवराज मैनाली जस्तो सर्जकहरूले  सेतुको भूमिका निर्वाह गर्ने बताउनुभयो ।

सदनका अध्यक्ष वरिष्ठ साहित्यकार विजय चालिसेले सबैलाई धन्यवाद सहित समारोहको समापन गर्नु भएको थियो ।