एउटै डेरीले बदल्यो समुदायको धारणा

आफ्नै खबर

२३ जेठ २०८२ शुक्रबार (१ दिन अघि)

पाठक संख्या ७८

कञ्चनपुर/  शुक्लाफाँटा नगरपालिका–१० झलारीका ललित हमालले दुई दशकअघि साइकलमा दूध बेच्न सुरु गर्दा धेरैले उहाँको निर्णयलाई हल्कासँग लिएका थिए । दूध बेचेर पनि कमाइ हुन्छ र ? भनेर अनेक तर्कवितर्क गरिन्थ्यो । तर समयले प्रमाणित गरिदियो, साँचो लगनशीलता र मेहनतले कहिल्यै धोका दिँदैन ।

‘सुरुमा साथीभाइले हाँसो गरे, परिवारले पनि चिन्ता व्यक्त गरे’, ललित भन्नुहुन्छ, ‘म व्यावसायिक कार्य गर्न दृढ थिएँ । मेहनत गर्छु, केही न केही गर्छु भन्ने अठोट लिएर अगाडि बढेँ । यही अठोटले आज दुग्ध व्यवसायीका रूपमा चिनायो ।’

सुरूमा गाउँगाउँ घुमेर ललितले ५० लिटर दूध साइकलमा बोकेर महेन्द्रनगर बजारमा लगेर बेच्नुहुन्थ्यो । हाल झलारी बजारमा डेरी व्यवसाय सुरू गरी दैनिक एक हजार एक सय लिटर दूध खपत गर्नुहुन्छ । दुई सय किसानले ल्याएको दूध उहाँको डेरीमा खरिद हुने गरेको छ ।

दुई करोड ५० लाख रुपैयाँ उहाँले डेरी व्यवसायमा लगानी गर्नुभएको छ । डेरीबाट दूध, दही बिक्री गर्ने कार्यसँगै लालमोहन, पेडा, बालमिठाइ, रसबरी, मिल्क केक, लज, लस्सी, मोही, नौनी र घ्यू उत्पादन गरी बिक्री हुने गरेको छ ।

वर्षमा तीन करोड रुपैयाँभन्दा बढी डेरी व्यवसायको कारोबार हुने गरेको छ । व्यवसायकै कमाइबाट उहाँले एक करोड २० लाख रुपैयाँमा बजार क्षेत्रमा तीनतले घर निर्माण गर्नुभएको छ । उहाँ भन्नुहुन्छ, ‘दुई दशकअघि व्यवसायी बन्ने सपना सफल भएको छ ।’ डेरी व्यवसायमा पाँच जनालाई उहाँले रोजगारी पनि दिनुभएको छ । 

‘सुरुमा व्यवसाय सञ्चालन गर्दा ५० लिटर दूध बिक्री गर्न पनि समस्या हुन्थ्यो । स्थानीय बजारमा खपत हुँदैनथ्यो’, उहाँले भन्नुभयो, ‘महेन्द्रनगर पुर्‍याएर बेच्न थालेपछी खपत बढ्दै गयो । त्यसपछि सय लिटर दूध खरिद गरी बेच्न थालेँ । दूध बिक्री गरेको ३० हजार रुपैयाँले केही फर्निचर खरिद गरेँ । काउन्टर बनाएँ, भाँडाकुँडा स्थानीयले निःशुल्क दिए, पछि फिर्ता गरेँ ।’

निरन्तर व्यवसाय बढ्दै गएको र त्यसपछि चुलोमा दाउरा बालेर दूध तताउने कार्यसँगै मिठाई बनाउन थालेको उहाँले बताउनुभयो । उहाँ भन्नुहुन्छ, ‘आम्दानी बढेपछि क्रिम सेपरेटर मेसिन खरिद गरेँ । फ्रिजको निकै आवश्यक थियो, त्यो पनि खरिद गरेँ । त्यसपछि २०७६ सालमा २० लाख रुपैयाँ पशुपन्छी क्षेत्रीय निर्देशनालयबाट अनुदान रकम पाएपछि व्यवसायलाई अगाडि बढाउन सहज भयो ।’

अहिले बैंकबाट ८० लाख रुपैयाँ कर्जा लिएर डेरी मिनी प्लान्ट जडान गरी आधुनिक रूपमा व्यवसाय गर्न थालेको उहाँले बताउनुभयो । बैंकबाट लिएको कर्जामध्ये २० लाख रुपैयाँ उहाँले चुक्ता गर्नुभएको छ ।

सरकारले पारदर्शी रूपमा सहुलियतपूर्ण रूपमा बैंकबाट कर्जा उपलब्ध गराउने कार्यसँगै विद्युत्, मेसिन र आधुनिक प्रविधिको विकासमा सहुलियत पुर्याउनुपर्ने उहाँ बताउनुहुन्छ । प्याकेजिङ, लेबलिङ, स्टोरिङ गर्ने तौरतरिका सिकाउनका लागि तालिम दिनुपर्ने ललितको माग छ । 

ललितले झलारी बजारमा मात्र नभएर कैलालीको धनगढीमा पनि डेरी व्यवसाय सञ्चालन गर्दै आउनुभएको छ । उहाँका माइला दाजुले धनगढीको डेरी पसल सञ्चालन गर्दै आउनुभएको छ । गुणस्तरीय डेरी प्रोडक्ट उपलब्ध गराउँदै आएकाले ग्राहकको विश्वास बढ्दा कारोबार पनि बढ्दै गएको उहाँ बताउनुहुन्छ ।

स्थानीय बजारमा नै डेरी सञ्चालन गरी स्वरोजगारको सृजना गर्दै जीवनशैली मात्र नभएर समुदायको धारणा बदल्न ललित सफल हुनुभएको वडाध्यक्ष लालबहादुर ऐर बताउनुहुन्छ । ‘स्वरोजगारमूलक व्यवसायलाई प्रोत्साहित गर्न तयार छौँ’, उहाँले भन्नुभयो, ‘डेरी व्यवसाय आत्मनिर्भरताको मेरुदण्डका रूपमा रहेको छ ।’

–रासस