फुङ्लिङ/ सिदिङ्वा गाउँपालिकाको सीमा क्षेत्रमा रहेको ढङ्ढङ्गे झरना अझैपनि आम दृष्टिबाट टाढा छ । सिदिङ्वा—५ लिम्बुदिन र ६ मेहेलेको बीचमा रहेको यो झरना आफैँमा बाजाको ताल जस्तो लाग्छ ।
यही विशेषताका कारण यस झरनालाई स्थानीयले ‘ढङ्ढङ्गे’ नामकरण दिएका हुन । जहाँ जलको बहाव र चट्टानको सङ्घर्ष सङ्गीत बन्छ । स्थानीय असलबहादुर राईले भन्नुभयो, ‘पहिला त फावाखोला भन्ने गरिन्थ्यो, अहिले ढङ्ढङ्गे भनेर चिनिन्छ । बाजा बजाएजस्तो आवाज आउँछ ।’
ढङ्ढङ्गे झरनाको प्राकृतिक सुन्दरता यति अद्वितीय छ, कि एक पटक पुग्ने जो कोहीको स्मृतिमा अमिट रूपमा बस्छ । पछिल्लो समय यहाँ आन्तरिक पर्यटकको सङ्ख्या विस्तारै बढ्दै गएको छ ।
स्थानीय बासिन्दा अब बाह्य पर्यटक पनि आकर्षित हुने आशामा छन् । नयाँ सम्भावनाको ढोका खुल्ने अपेक्षामा बसेका छन् । स्थानीय नारायणप्रसाद राई बताउनुहुन्छ, ‘हामी त पर्खिराखेका छौँ । बाहिरबाट पनि पर्यटक आएर आम्दानीको स्रोत बनोस् भनेर ।’
झरनामा पुग्ने आन्तरिक पर्यटकको अनुभव विशेष हुन्छ । दृश्य सुन्दर मात्र होइन, आत्मामा शान्ति दिने किसिमको अनुभूति उनीहरूले व्यक्त गरेका छन् ।
आन्तरिक पर्यटक सहारा लिम्बूले बताउनुभयो, ‘नाम सामान्य लाग्यो तर दृश्य हेर्दा मुखमै मुस्कान आयो । यस्तो प्राकृतिक उपहार देख्दा मन रमायो ।’
झरनालाई पर्यटकीय क्षेत्र बनाउका लागि स्थानीय सरकार पनि सक्रिय देखिन्छ । झरनासम्म पुग्न ढुङ्गाका गोरेटो बनाइएका छन्, होमस्टे निर्माणको तयारी भइरहेको छ । आगामी नीति तथा कार्यक्रममा ढङ्ढङ्गे झरनालाई विशेष प्राथमिकता दिइएको सिदिङवा गाउँपालिका उपाध्यक्ष वन्दना कडरीयाले बताउनुभयो ।
तर, अझै पनि झरनाको आधिकारिक लम्बाइ मापन गरिएको छैन । वैज्ञानिक दृष्टिकोणले यसको अध्ययन आवश्यक छ । प्रचारप्रसारलाई तीव्रता दिन सकिएमा यो झरना जिल्लाको अर्को पर्यटकीय परिचय बन्न सक्छ ।
जिल्ला सदरमुकाम फुङ्लिङ बजारदेखि पाँचथरको गणेश चोक हुँदै करिब तीन घण्टामा साब्लाखु भञ्ज्याङ पुग्न सकिन्छ । साब्लाखुदेखि करिब ४० मिनेटपछि ढङ्ढङ्गे झरनासम्म पुग्न सकिन्छ ।
झरनासम्म नै सहजरुपमा मोटर बाटो विस्तार भएकाले सवारिसाधन सहजरूपमा झरनासम्म पुग्दै आएको छ । ताप्लेजुङ, जहाँ प्रत्येक पहाडको ढिस्को र खोल्साको गर्जनमा पर्यटकीय सम्भावनाको ध्वनि लुकेको छ । मिक्वाखोलाको फुङ्फुङगे झरनाको चर्चा धेरैले सुनेका छन् ।
–रासस
प्रतिक्रिया दिनुहोस