मासुजन्य पशु पाल्ने किसानलाई अनुदान

आफ्नै खबर

२८ असार २०८२ शनिबार (१ दिन अघि)

पाठक संख्या ८०

गोरखा/  धार्चे गाउँपालिकाले मासु उत्पादन गर्ने किसानलाई नगद अनुदान वितरण गरेको छ । 

चालु आर्थिक वर्ष २०८१/८२ मा सञ्चालन गरिएको ‘मासुजन्य उत्पादन अनुदान कार्यक्रम’ अन्तर्गत पालिकाभित्रका ६१ जना किसानलाई ६ लाख रुपैयाँ अनुदान रकम प्रदान गरिएको गाउँपालिकाका अध्यक्ष लक्ष्मण गुरुङले जानकारी दिनुभयो ।

‘पालिकालाई मासुमा आत्मनिर्भर बनाउन र मासु तथा मासुजन्य उत्पादनका लागि किसानलाई हौसला प्रदान गर्न अनुदान कार्यक्रम सञ्चालन गरिएको हो’, उहाँले भन्नुभयो, ‘कार्यक्रममार्फत सानासाना पशुपालक किसानले पनि लाभको अवसर प्राप्त गरेका छन् ।’ 

कार्यक्रमले मासुजन्य उत्पादन वृद्धि मात्र नभई विस्तारै स्थानीय रोजगारी सिर्जनामा समेत टेवा पुग्ने गाउँपालिका अध्यक्ष गुरुङको भनाइ छ । मासुजन्य उत्पादनका आधारमा अनुदान प्राप्त गर्ने किसानले नौ सय रुपैयाँदेखि ५० हजार रुपैयाँसम्म नगद अनुदान प्राप्त गरेको गाउँपालिका पशुसेवा शाखाका प्रमुख हर्क कार्कीले जानकारी दिनुभयो ।

‘अनुदानका लागि किसानको गोठमै पुगेर स्थलगत निरीक्षण तथा नापतौल गरेर अनुदान वितरण गरिएको छ’, उहाँले भन्नुभयो, ‘अनुदान कार्यक्रमले किसानमा व्यावसायिक पशुपालनतर्फको आकर्षण बढ्न थालेको छ ।’

गाउँपालिकाले खसीको मासुमा प्रतिकेजी ३० रुपैयाँ, राँगाको मासुमा १५ रुपैयाँ, बङ्गुरको मासुमा ४० रुपैयाँ र ब्रोइलर कुखुरा (३५–४५ दिन उमेरका) प्रतिगोटा ७० रुपैयाँका दरले नगद अनुदान दिने व्यवस्था गरेको छ । अनुदान प्राप्त गर्ने किसानलाई बैङ्क खातामार्फत भुक्तानी दिने गरिएको प्रमुख कार्कीले बताउनुभयो ।

गाउँपालिकाले वडा नम्बर १ का नौ जना, वडा नम्बर २ का २२ जना, वडा नम्बर ३ का एक जना, वडा नम्बर ४ का तीन जना, वडा नम्बर ५ का दुई जना, वडा नम्बर ६ का तीन जना र वडा नम्बर ७ का २१ जना किसान लाभान्वित भएका छन् । 

‘पहिलोपटक आफ्नो मेहनतको मूल्य पाइएको छ’, स्थानीय किसान हिरामाया गुरुङले भन्नुभयो, ‘नगद अनुदान कार्यक्रमले हामीजस्ता साना किसानलाई ठूलो हिम्मत दिएको छ ।’

गाउँपालिकाले आगामी आर्थिक वर्षका लागीसमेत मासुजन्य उत्पादन अनुदानका लागि बजेट विनियोजन गरेको उहाँले बताउनुभयो । किसानलाई पशुपालनमा आत्मनिर्भरता र व्यावसायिकता अभिवृद्धि गर्ने योजना बनाएको जनाएको छ ।

–रासस