सुरु भयो ‘बा’हरूका लागि मानवसेवा आश्रम

आफ्नै खबर

८ भदौ २०८२ आईतबार (८ घण्टा अघि)

पाठक संख्या ५६

रौतहट/  कुशेऔँसीका अवसरमा सडक आश्रित ‘बा’हरूका लागि चन्द्रपुर–७ बनबहुअरीमा मानवसेवा आश्रम सञ्चालनमा ल्याइएको छ । आश्रमको सांसद देवप्रसाद तिमल्सिना र प्रमुख जिल्ला अधिकारी विनोद खड्कालगायतले सडक आश्रित ‘बा’हरूलाई आश्रममा प्रवेश गराई शनिबार सेवा शुभारम्भ गर्नुभएको थियो ।

उक्त अवसरमा सांसद तिमल्सिनाले आगामी दिनमा आश्रमलाई आवश्यक पर्ने बस्तुहरु सहयोग गर्ने जानकारी दिनुभयो ।  

कार्यक्रममा प्रमुख जिल्ला अधिकारी खड्का, गढीमाई नगरपालिकाका उपप्रमुख स्मिता यादव, गरुडा नगरपालिका प्रमुख कन्थमणिप्रसाद कलवार, जिल्ला समन्वय समिति प्रमुख राम अयोध्या यादव, पत्रकार महासङ्घ रौतहट शाखाका अध्यक्ष सञ्जय कार्की, चन्द्रपुर नगर उद्योग वाणिज्य सङ्घका अध्यक्ष उदयनारायण सापकोटा, निजानन्द धामका सन्त गुरु सुरेन्द्र दाहाललगायतले मानव सेवा आश्रमलाई सञ्चालन गर्न आवश्यक सहयोग गर्ने प्रतिवद्धता जनाउनुभयो ।   

उक्त आश्रम सञ्चालनका लागि तीन  लाख ३८ हजार रुपैयाँबराबर नगद तथा जिन्सी सहयोग प्राप्त भएको आश्रमका मधेस प्रदेश संयोजक विवेक महतोले जानकारी दिनुभयो ।

गरुडा नगरपालिकाका प्रमुख कलवारले दुई लाख ५१ हजार रुपैयाँ नगरपालिकाको तर्फबाट र पूर्वमन्त्री तथा प्रदेशसभा सदस्य कृष्ण यादवले ५१ हजार रुपैयाँबराबरको खाद्यान्न सामग्री सहयोग गर्ने प्रतिबद्धता गर्नुभएको आश्रमका प्रदेश संयोजक महतोले बताउनुभयो ।

यसैगरी कृष्ण प्रणामी युवा परिषद्ले ६० हजार रुपैयाँ बराबरको खाद्यान्न तथा लत्ताकपडा, जनज्योति बहुमुखी क्यामपस चन्द्रनिगाहपुरका स्ववियु सचिव साहिल पुरीले २० हजार रुपैयाँ, पशु चिकित्सक दुर्गाप्रसाद चिमोरियाले ११ हजार रुपैयाँ, प्रजापति पौडेलले ११ हजार रुपैयाँ, विनोददास कथबनियाले १० हजार पाँच सय रुपैयाँ, अर्पणा देवकोटाले १० हजार रुपैयाँ सहयोग गर्नुभएको संयोजक महतोले जानकारी दिनुभयो । 

यस्तै, कृष्ण प्रणामी युवा परिषद् प्रारम्भिक समिति निजानन्दधाम, पत्रकार महासङ्घ रौतहट शाखाका अध्यक्ष कार्कीलगायतले सहयोग गर्नुभएको थियो ।  

रौतहटका ६ र अन्य जिल्लाका १४ जना गरी अहिले उक्त आश्रममा २० जना सडक आश्रित छन् । आश्रितलाई बास र खानाको सुविधामात्र नभइ सीप, दक्षता र क्षमता विकासमार्फत समाजमा पुनःस्थापना गर्ने लक्ष्यका साथ सेवा विस्तार गरिएको उहाँको भनाइ छ ।

भदौ ५ गतेबाट सुरु गरिएको उद्धार अभियानअन्तर्गत इलाका प्रहरी कार्यालय चन्द्रनिगाहपुरदेखि चन्द्रपुर नगरपालिका–१, बागमती मङ्गलपुरसम्म ६ जना सडक मानवको उद्धार गरी आश्रममा स्थानान्तरण गरिएको छ । आश्रमका संयोजक विवेक महतोले २०८२ सालभित्रै रौतहटलाई सडक मानवरहित बनाउने लक्ष्य लिएको जानकारी दिनुभयो ।

–रासस