‘अर्थतन्त्र माथि उठाउन कानूनी स्पष्टता आवश्यक छ’ 

आफ्नै खबर

२ असोज २०८२ बिहिबार (२ घण्टा अघि)

पाठक संख्या ५७

काठमाडौँ/  नेपाल राष्ट्र बैङ्कका गभर्नर डा. विश्वनाथ पौडेलले अर्थतन्त्रको विकासमा लागि कानूनी स्पष्टता जरुरी रहेको बताउनुभएको छ । नेपाल आर्थिक पत्रकार समाज (सेजन)को नयाँ कार्यसमितिलाई स्वागत गर्ने क्रममा उहाँले कतिपय अवस्थामा कानूनी स्पष्टता नहुँदा काम गर्न समस्या भएकाले कानूनको चापअनुसारको स्पष्टता हुनु जरुरी भएको उल्लेख गर्नुभयो । 

मुलुकमा पछिल्लो समय उत्पन्न परिस्थितिबाट अगाडि बढ्ने क्रममा आइपर्ने समस्या समाधानका लागि पनि कानूनी स्पष्टता जरुरी रहेको उहाँको भनाइ थियो ।

उहाँले भन्नुभयो, ‘कानूनको स्पष्टता सबै क्षेत्रमा आवश्यक पर्छ । विशेष गरी पत्रकारहरूले समाचार लेख्ने क्रममा कानूनको व्याख्या राम्रो भएन भने गलत सन्देश जाने जोखिम हुन्छ । यसमा सबै सचेत हुनुपर्छ ।’

आम नागरिकसँग अन्तरक्रिया गर्नका लागि पत्रकारिता महत्वपूर्ण माध्यम हुने उल्लेख गर्दै उहाँले सेजनसँगको सहकार्यका लागि केन्द्रीय बैङ्क तयार रहेको समेत बताउनुभयो । 

जेनजी प्रदर्शनका क्रममा क्षतिग्रस्त संरचनाको पुनःनिर्माणका लागि स्रोतको अभाव नहुने उल्लेख गर्दै उहाँले भन्नुभयो, ‘पुनःनिर्माणका लागि ठूलो स्रोत आवश्यक छ । यद्यपि त्योभन्दा महत्वपूर्ण विषय सुशासन र प्रशासनिक कार्यक्षमतामा सुधार हो ।’

प्रदर्शनका क्रममा निजी क्षेत्रमाथि पनि आक्रमण हुनुले व्यवसायीमा चिन्ता थपिए पनि अब निजी क्षेत्रको मनोबल उच्च बनाउँदै अगाडि बढ्नुको विकल्प नभएको उहाँले बताउनुभयो ।

गभर्नर पौडेलले भन्नुभयो, ‘प्रदर्शनका क्रममा कैयौँ निजी व्यापारिक भवनमा क्षति पुगेको छ । तर, अब हाम्रो प्राथमिकता स्वदेशमा लगानीको वातावरण निर्माण गरी विदेशी लगानी आकर्षित गर्नमा हुनुपर्छ । त्यसैले सुरुमा स्वदेशको लगानीलाई यहीँ रोक्ने वातावरण बनाउन सकियो भने अर्थतन्त्रमा गतिशील हुन लामो समय लाग्दैन ।’

उहाँले अर्थतन्त्रको विकासका लागि राजनीतिक स्थायित्व, लगानीमैत्री वातावरण, निजी क्षेत्रको मनोबलमा अभिवृद्धि आवश्यक भएको समेत उल्लेख गर्नुभयो । साथै, व्यवसायी जोगाउनका लागि अर्थतन्त्रको प्रणालीमै सुधार जरुरी रहेको उहाँको भनाइ थियो ।