पुर्ख्यौली सीप जोगाउन घरमै उद्योग

आफ्नै खबर

२३ असोज २०८२ बिहिबार (३ घण्टा अघि)

पाठक संख्या ६४

कञ्चनपुर/  शुक्लाफाँटा नगरपालिका-७ का जगतबहादुर सिंहलाई यतिबेला कपडा उत्पादन र तयारी पोशाक बनाउन भ्याइनभ्याइ छ । 

चाडपर्वका कारण बजारमा माग बढेपछि श्रीमान, श्रीमतीसहित परिवारका सदस्य कपडा बुन्न र सिलाउन व्यस्त देखिन्छन् । घरमै तान बनाएर सुरु गरिएको उद्योगमा धागो कात्ने, कपडा बुन्ने र पोशाकसमेत तयार गरिन्छ । पुख्र्यौली सीपलाई पुस्तान्तरण गर्न स्थापना गरिएको उद्योगमा अहिले अल्लो, गाँजा, बाँस र ऊनका कपडा उत्पादन हुने गर्दछन । 

यसबाट सीपको सदुपयोग र परिवार नै स्वरोजगार भएकाले सिंह बताउनुहुन्छ । हालै उहाँले चारवटा मेसिन थपेर उद्योगको क्षमता बढाउनुभएको छ । 

‘हाम्रा पुर्खाले दार्चुलामा हुँदा राडी पाखीको काम गर्थे । हाम्रा पुर्खाबाट सीकेको सीपलाई सदुपयोग गर्न घरमै उद्योग स्थापना गरेका हौँ’, सिंहले भन्नुभयो, ‘तीन लाख रुपैयाँ लगानीमा हाते मेसिनबाट सुरु गरेको उद्योगमा अहिले २० लाख रुपैयाँ लगानी पुगिसक्यो ।’

‘एक जना भारतीय कामदार राखेका छौं । दुई छोरा, श्रीमती र आफू पनि उद्योगमै काम गर्छौं’, उहाँले भन्नुभयो, ‘यसबाट हाम्रो परिवारको खर्च चलेको छ, सन्तुष्ट छौँ ।’ सुरुवातका वर्षभन्दा पछिल्ला वर्षमा तयारी कपडाको माग धेरै आउने गरेको उहाँले बताउनुभयो ।

सिंह परिवारको पुर्ख्यौली पेशा नै कपडा बुन्ने हो । दार्चुलामा राडीपाखी बनाएर बिक्री गर्ने उहाँहरु २०४४ सालमा तराई बसाइ सर्नुभयो । त्यसपछि पुर्ख्यौली पेशाले निरन्तरता पाउन नसके पनि ३५ वर्षपछि पारिवारिक सल्लाहपछि पुनः आफ्नो कामलाई सुरुवात गरेको उहाँको भनाइ छ ।

‘सीप हुँदा हुँदै त्यतिकै बस्नभन्दा उद्योग स्थापना गरौँ भन्ने एक दिनको पारिवारिक बसाइमा सल्लाह भयो’, सिंहले भन्नुभयो, ‘उद्योग स्थापनापछि हरेक वर्ष राम्रो आम्दानी हुँदै गएको छ । गत वर्ष मात्रै तीन लाख रुपैयाँ आम्दानी भयो ।’

घरमै उद्योग स्थापना गर्दा कामदारको समस्या भोग्नु परेको उहाँ बताउनुहुन्छ । ‘अहिले पनि उद्योगमा कामदार पाउन मुस्किल छ, भारतीय कारिगर मात्रै छन्’, उहाँले भन्नुभयो, ‘देशभित्र मेहनत गर्ने बानी छैन सबैमा विदेश मोह छ ।’ 

उहाँले आफूले स्वदेशमै कच्चा पदार्थ प्रशोधन गरेर धागो उत्पादन गर्ने गरेको बताउनुभयो । केही कच्चा पदार्थ भने भारतबाट आयात गर्ने गरेको उहाँको भनाइ छ । कपडाभन्दा तयारी पोसाकको माग धेरै आउने गरेकाले अहिले तयारी पोसाक उत्पादनमा जोड दिएको सिंह बताउनुहुन्छ ।

‘स्थानीय उत्पादन टिकाउ पनि हुन्छ स्वास्थ्यका लागि पनि फाइदाजनक छ’, सिंहले भन्नुभयो, ‘सुरुवातमा बजारमा समस्या थियो अहिले माग धेरै आउने गरेको छ ।’

प्राकृतिक फाइबरबाट निर्मित कपडा शरीरका लागि निकै फाइदाजनक मानिन्छ । यसको  निर्माणका लागि अल्लो र गाँजाको धागो मात्रै उत्पादन हुने गर्दछ भने कटनका लागि भारतबाट धागो आयात गर्नुपर्ने झन्झट छ । त्यसैले यस्ता कच्चापदार्थ स्वदेशमै उत्पादन गर्न सके त्यसले घरेलु उद्योग सञ्चालनमा निकै टेवा पुग्ने उहाँको भनाइ छ ।

–रासस