सामूहिक खेतीप्रति बढ्दो आकर्षण

आफ्नै खबर

२४ असोज २०८२ शुक्रबार (२ महिना अघि)

पाठक संख्या १२९

दाङ/  पछिल्लो समय दाङका महिला सामूहिक खेतीमा लागेका छन् । घोराही उपमहानगरपालिका-८ कटुकी सेवारमा रहेको जनचेतना महिला कृषक समूहले सामूहिक खेती गरेर मनग्य आम्दानी गरेका छन् । 

घोराही उपमहानगरपालिका-८ कटुकीका वसन्ती चौधरी समूहमा आबद्ध भएको दुई वर्ष भयो । उहाँ जनचेतना महिला कृषक समूहको कोषाध्यक्ष हुनुहुन्छ । समूहमा रहेका २० जनाले सामूहिक खेती गर्ने गरेको उहाँले बताउनुभयो ।

उहाँले भन्नुभयो, ‘सोही वडामा २५ कट्ठा जमिन भाडामा लिएर आलु र प्याजखेती गरेका थियौँ । आलु उत्पादन राम्रो भयो र प्याज पनि राम्रो भएको छ । दुईवटा टनेल बनाएर तरकारीखेती गरेका छौँ ।’ कृषि ज्ञान केन्द्रले लक्षित वर्गका लागि बजेट सहयोग गरेको छ । 

सोही कार्यालयले २० जनालाई २० हजार रुपैयाँका दरले बीउपुँजी सहयोग गरेको उहाँले बताउनुभयो । समूहमा आबद्ध भएपछि सरकारी कार्यालय र अन्य कार्यालयमा केके कार्यक्रम आउँछन्, त्यसका बारेमा जानकारी हुने गरेको र अनुदानका लागि फारम भरेको उहाँले बताउनुभयो ।

समूहका अध्यक्ष देउकुमारी चौधरीले आफ्नो र भाडामा लिएको जमिनमा सामूहिक खेती गरेको बताउनुभयो । घरको जमिनमा गरेको खेती घरमै राख्ने तर सामूहिक गरेको खेतीको आम्दानी समूहमा राख्ने गरेको बताउनुभयो ।

गत वर्ष सामूहिक खेती गरेको धान बिक्री गरेर ६० हजार, आलु बिक्रीबाट २० हजार, ब्रोकाउली  बिक्रीबाट १२ हजार, तरकारीका बेर्ना बिक्रीबाट आठ हजार, काउली बिक्रीबाट चार हजार पाँच सय, प्याजको बेर्ना बिक्रीबाट तीन हजार र गहुँ बिक्रीबाट १२ हजार रुपैयाँ आम्दानी भएको उहाँले बताउनुभयो ।

समूहमा काम गर्न थालेपछि एक लाख २० हजार रुपैयाँ आम्दानी भइसकेको उहाँको भनाइ छ । पन्ध्र क्विन्टल प्याज थियो, त्यो बिक्री भइरहेको छ । सामूहिक खेती गर्न धेरै सजिलो भएको छ । समयमा खेताला नपाइने र जनशक्ति कम भएका बेला सामूहिक खेतीले सहज भएको उहाँको भनाइ छ ।

भेटेरिनरी अस्पताल तथा पशुसेवा विज्ञ केन्द्रले बङ्गुरपालनका लागि खोर बनाउन १० लाख रुपैयाँ बजेट सहयोग गरेको उहाँले बताउनुभयो । अध्यक्ष चौधरीले समूहका सबै सदस्यले वित्तीय साक्षरता सिकेर बचत गर्न, लगानी गर्न, ऋण व्यवस्थापन गर्न, आम्दानी र खर्चमा योजना बनाउने गरेको बताउनुभयो ।

उहाँले भन्नुभयो, ‘सामूहिक काम गर्दा छिटो र छरितो हुने गरेको छ, खेताला लगाउन नपर्ने सजिलै काम सकिने भएको छ ।’

पशुसेवा विज्ञ केन्द्रका सूचना अधिकारी कृष्ण न्यौपानेले लक्षित वर्गका लागि आएको बजेट महिला समूहलाई दिएको बताउनुभयो । महिलाहरूको आयआर्जनमा टेवा पुर्याउने उद्देश्यले सहयोग गरेको बताउनुभयो ।

–रासस