हङकङमा भएको सम्मेलनमा मध्यपूर्वका नेपालीको सुरक्षाबारे चिन्ता

काठमाडौँ/  एसोसिएसन अफ नेपाली ओरिजिन (एएनओ) को शनिबार हङकङमा सम्पन्न सम्मेलनले पछिल्लो समय मध्यपूर्वी मुलुकमा कार्यरत नेपालीहरूको सुरक्षामा ध्यान दिन नेपाल सरकारको ध्यानाकर्षण गराएको छ ।

विश्वमा देखापरिरहेको सुरक्षा चुनौतीका सन्दर्भमा हाल मध्यपूर्वमा बसोवास गरिरहेका नेपालीहरूको सुरक्षाप्रति विशेष चासो दिन र आवश्यक पहल गर्न सरकारले ध्यान पुर्याउनुपर्ने प्रस्ताव सो सम्मेलनमा पारित भएको हो ।

सम्मेलनले विश्वका जुन ठाउँमा जन्मे पनि र जुन देशको नागरिकता बोके पनि नेपाली मूलको पहिचान गरी नेपालीभाषी नागरिकहरूका बीचमा आपसी एकता कायम गर्दै नेपाली जातिको संरक्षण र सम्वर्द्धन गर्दै उक्त शक्तिलाई नेपालको हितमा प्रयोग गर्नुपर्ने प्रस्ताव पनि पारित गरेको छ ।

हङकङ सरकारका डिस्ट्रिक्ट काउन्सिलर प्रथम नेपाली अरुणा गुरुङ र एएनओका अन्तर्राष्ट्रिय कमिटी महासचिव चूडामणि भट्टराईद्वारा शनिबार साँझ उद्‌घाटन गरिएको उक्त सम्मेलनमा हङकङमा रहेका नेपाली मूलका तथा नेपालीभाषी ठूलो सङ्ख्याका नागरिकको सहभागिता रहेको एएनओले विज्ञप्तिमार्फत जनाएको छ ।

त्यस अवसरमा एएनओ अन्तर्राष्ट्रिय समितिका महासचिव चूडामणि भट्टराई र केन्द्रीय सदस्य खुसी गुरुङ तथा डिस्ट्रिक्ट काउन्सिलर अरुणा गुरुङले संसारका जुनसुकै देशमा जन्मे हुर्केको भएपनि नेपाली जातिका मानिसहरूलाई एकआपसमा जोड्ने र नेपाली जातिको एकता र संस्कृतिको पुस्तान्तरण गर्ने कार्यमा एएनओको सफलताको कामना गर्नुभयो । 

नेपाली जातिको आफ्नै पहिचान र अतित्वसहितको जीवन यापनका लागि सामाजिक सांस्कृतिक अभियान सञ्चालन गरिरहेका अमेरिका निवासी डिल्ली अधिकारीको नेतृत्वमा सन् २०२४ मा एएनओ स्थापना भएको थियो ।

उक्त संस्थाले विश्वका नेपाली जातिबीच जतिसुकै पुस्ता बाहिर बस्नु परेपनि आफू बसेकै देश तथा स्थानमा नेपाली भाषा, कला, संस्कृति, रीतिरिवाज र नेपाली पहिचानको निरन्तरता, यसको विस्तार र पुस्तान्तरणको अभियान सञ्चालन गरिरहेको छ ।

साथै एएनओले विश्वभरका नेपालीको श्रम, पूँजी र ज्ञानलाई नेपालको समृद्धिमा लगाउन आफ्ना जातिका मानिसहरूको पहिचान गर्न तथा नेपाली मूलका नागरिकहरूलाई आफूसँग कुनै न कुनै रुपमा जोड्ने नीति बनाउन पनि नेपाल सरकारसँग माग गर्दै आएको छ ।

सोही अवसरमा हङकङका स्थानीय युवा व्यवसायी विक्की थापाको अध्यक्षतामा एएनओको हङकङ कमिटी पनि गठन गरिएको छ । यसको उपाध्यक्षमा अजय राई, महासचिवमा सुकु लिम्बू, सचिवमा अनुज रोक्का, कोषाध्यक्षमा सोफिया गुरुङ र प्रवक्तामा सुरेश याक्सो हुनुहुन्छ ।

त्यसैगरी सदस्यहरूमा सरला तामाङ, टपराज तामाङ, रिस्ता गुरुङ, मेजिला गुरुङ, भीम गुरुङ, जुनु राना, विन्नी लामा राई र करन तामाङ चयन हुनुभएको छ ।

–रासस