६ महिनामा नेपाल आए ७ लाख पर्यटक

काठमाडौँ सन् २०२४ को सात महिनामा विदेशी पर्यटक आगमन २१ दशमलव २२ प्रतिशतले बढेको छ । नेपाल पर्यटन बोर्डले दिएको जानकारीअनुसार यस वर्षको जुलाईसम्म ६ लाख ४७ हजार छ सय १५ विदेशी पर्यटक नेपाल आएका छन् । जबकि गत वर्षको सोही अवधिमा ५ लाख ३४ हजार दुई सय सात पर्यटक नेपाल आएका थिए । 

यस वर्षको जनवरीमा ७९ हजार १ सय, फेब्रुअरीमा ९७ हजार ४ सय २६, मार्चमा १ लाख २८ हजार १ सय ६७, अप्रिलमा १ लाख ११ हजार ३ सय ७६, मेमा ९० हजार २ सय ११ पर्यटक नेपाल आएका थिए । साथै जुनमा ७६ हजार ७ सय ३६ र जुलाईमा ६४ हजार ५ सय ९९ पर्यटकले नेपाल भ्रमण गरेका छन् ।

सन् २०२४ को जुलाईमा विदेशी पर्यटक आगमन झण्डै १२ प्रतिशतले बढेको छ । नेपाल पर्यटन बोर्डले उपलब्ध गराएको तथ्याङ्कअनुसार गत वर्षको जुलाईको तुलनामा यस वर्षको सोही अवधिमा ११ दशमलव ९ प्रतिशतले विदेशी पर्यटक बढेका हुन् । 

यस वर्षको जुलाईमा ६४ हजार ५ सय ९९ विदेशी पर्यटक आगमन भएकामा गत वर्षको सोही अवधिमा यो सङ्ख्या ७५ हजार ७ सय २६ थियो । बोर्डका अनुसार सन् २०२२ को जुलाईमा ४४ हजार ४ सय ६२, सन् २०२१ मा ३ हजार ६३, सन् २०२० मा १ सय ९६ पर्यटक नेपाल आएका थिए । कोरोना महामारी सुरु हुनुभन्दा अघिल्लो वर्ष अर्थात् सन् २०१९ को जुलाईमा ७० हजार ९ सय १६ विदेशी पर्यटकका नेपाल आगमन भएको थियो ।