नेपाली सेना स्वास्थ्य विज्ञान संस्थानमा सुरुभयो विद्यावारिधि तहको पठनपाठन

काठमाडौँ/  नेपाली सेना स्वास्थ्य विज्ञान संस्थान भण्डारखालमा विद्यावारिधि तह डिएम/एम सिएचतर्फ तीन विधामा विद्यावारिधि तहको पठनपाठन थालनी  भएको छ । ती विधामा डिएम कार्डियोलोजी, डिएम क्रिटिकल केयर तथा एम सिएच युरोलोजी विषय छन् ।

संस्थानका कार्यकारी निर्देशक उपरथी प्रा. डा. देवेन्द्रबहादुर खत्रीले भन्नुभयो, ‘विद्यावाधि तह डिएम/एम सिएचतर्फ डिएम कार्डियोलोजी, डिएम क्रिटिकल केयर  तथा एमसिएस युरोलोजी विषयमा पठनपाठन गर्न स्वीकृति प्राप्त भएको छ । पठनपाठन पनि थालनी भइसकेको छ ।’

संस्थानअन्तर्गत हाल स्नातक तहमा पाँच कार्यक्रम (एमबिबिएस, बिपिएच, विएससी एमएलटी, बिएनएस विएससी तथा नर्सिङ कार्यक्रा सञ्चालित छन् भने स्नातकोत्तर तह एमडी/एमएसतर्फ १८ विषय तथा एएनतर्फ विभिन्न पाँच विषयको पठनपाठन हुँदै आएको छ ।

हाल स्नातक विषयमा एक हजार दुई सय १५ र स्नातकोत्तर तहअन्तर्गत विभिन्न विधामा दुई सय ६५ विद्यार्थी अध्ययनरत छन् । ती स्नातक विषयमा एक हजार पाँच सय ९२ विद्यार्थी दीक्षित भएका छन् ।

कार्यकारी निर्देशक उपरथी प्रा. डा. खत्रीका अनुसार स्वास्थ्य विज्ञान संस्थानमा स्नातक, स्नातकोत्तर तथा विद्यावारिधि तहका शैक्षिक कार्यक्रमको सञ्चालन गरिएसँगै संस्थानद्वारा सञ्चालित शिक्षण अस्पताल वीरेन्द्र अस्पतालबाट प्रदान गरिने स्वास्थ्य सेवासहित समग्र स्वास्थ्य सेवाको गुणस्तरमा उल्लेखनीय सुधार आएको छ ।  

शतप्रतिशत उत्तीर्ण

नेपाल हेल्थ प्रोफेशनल काउन्सिलबाट लिइएको ‘लाइसेन्सिङ’ परीक्षामा बिपिएच तथा एमएलटी कार्यक्रमका र नेपाल नर्सिङ काउन्सिलद्वारा सञ्चालित ‘लाइसेन्सिङ’ परीक्षामा शतप्रतिशत विद्यार्थी उत्तीर्ण भएका थिए । यसरी उत्तीर्ण हुनेमा संस्थान पहिलो भएको जनाइएको छ ।

यसैगरी नेपाल मेडिकल काउन्सिलद्वारा २०८२ सालमा सञ्चालन भएको ‘लाइसेन्सिङ’ परीक्षामा संस्थानका ‘एमबिबिएस’ तहका ९६ प्रतिशत विद्यार्थी उत्तीर्ण भएका थिए ।

चिकित्सा शास्त्र अध्ययन संस्थानका डीन प्रा. डा. मोहनराज शर्माले भन्नुभयो, ‘स्थापनाको छोटो अवधिमा गुणस्तरीय चिकित्सा शिक्षा क्षेत्रमा संस्थानले ऐतिहासिक सफलता हात लागेको हो । चिकित्सा शिक्षाको जनशक्ति, अनुसन्धानसहित स्वास्थ्य सेवा प्रवाहमा नेपाली सेना स्वास्थ्य विज्ञान संस्थान भण्डारखालले छोटो समयमा  अब्बल प्रगति हासिल गरेको छ ।’

स्वास्थ्य विज्ञान क्षेत्रमा दक्ष, अनुशासित व्यावसायिक जनशक्ति उत्पादन, गुणस्तरीय शैक्षिक वातावरण सुनिश्चित गर्न, अनुसन्धान तथा नवीनतम ज्ञानको प्रवर्द्धन गर्न, नेपाली सेनासहित समग्र राष्ट्रको स्वास्थ्य सेवाको गुणात्मक क्षमता अभिवृद्धि गर्ने ध्येयले तत्कालीन प्रधानसेनापति छत्रमानसिंह गुरुङका पहलमा २०६७ भदौ ३० गते स्वास्थ्य विज्ञान संस्थानको स्थापना भएको थियो । 

दुई तहमा विषय थपिँदै

संस्थानले आगामी शैक्षिक सत्रदेखि स्नातक तहमा ब्याचलर इन फिजियोथेरापी, ब्याचलर इन फार्मेसी कार्यक्रम थप गर्ने तयारी गरेको छ ।

संस्थानका कार्यकारी निर्देशक उपरथी प्रा. डा. खत्रीले भन्नुभयो, ‘संस्थानको शैक्षिक दायरालाई समयानुकूल विस्तार गर्ने योजना रहेको छ । संस्थानले आगामी शैक्षिक सत्रदेखि स्नातक तहमा ब्याचलर इन फिजियोथेरापी, ब्याचलर इन फार्मेसी कार्यक्रम थप गर्ने तयारी गरेको छ । आवश्यक गृहकार्य सकेर  सम्बन्धित निकायमा स्वीकृतिका लागि पेस गरेका छौँ ।’

उहाँका अनुसार स्नातक कार्यक्रम ब्याचलर इन डेन्टल सर्जरी, ब्याचलर इन ओप्टोमेट्री तथा स्नातकोत्तर तहका कार्यक्रम एमडी इमरजेन्सी मेडिसिन, एमएस्सी एमएलटी बायोकेमेस्ट्री, एमएस्सी एमएलटी माइक्रोबायोलोजी तथा फेलोसिप इन अन्कोइमेजिङलगायतका कार्यक्रम सञ्चालन गर्न आवश्यक पहल तथा समन्वय भइराखेको छ ।

अब्बल अनुसन्धान

संस्थानले शैक्षिक कार्यक्रमका साथै खोज तथा अनुसन्धानलाई प्रभावकारी रुपमा निरन्तर जारी राखेको छ । गतवर्ष सङ्कायका सदस्य तथा स्नातक एवं स्नातकोत्तर तहका विद्यार्थीबाट दुई सय ९२ वटा अनुसन्धान प्रस्ताव भएकामा दुई सय १५ प्रस्ताव स्वीकृत भएका उहाँले जानकारी दिनुभयो ।

निर्देशक उपरथी प्रा. डा. खत्रीले भन्नुभयो, ‘संस्थानमा अनुसन्धानमूलक शैक्षिक वातावरण क्रमशः सुदृढ हुँदै गएको छ । शैक्षिक कार्यक्रमहरूलाई व्यवहारिक, समुदायमुखी तथा परिणाममुखी बनाउन संस्थानले पाठ्यक्रमअनुसार प्राज्ञिक तथा समुदायमा आधारित स्थलगत अध्ययनलाई उच्च प्राथमिकता दिएको छ ।’

हाल संस्थानमा ३८ प्राध्यापक, ६८ सह प्राध्यापक, एक सय ४२ उप प्राध्यापक सेवारत रहेका छन् । संस्थानबाट प्रकाशित मेडिकल जर्नलले अन्तराष्ट्रिय तहमा उच्च स्थानका साथ मान्यता पाएको छ । साथै नेपालबाट प्रकाशित हुने १० मेडिकल जर्नलभित्र पर्न सफल भएको उहाँले जानकारी दिनुभयो ।

निर्देशक उपरथी प्रा. डा. खत्रीले भन्नुभयो, ‘संस्थानको अनुसन्धान, शैक्षिक गुणस्तर तथा प्राज्ञिक योगदानलाई राष्ट्रिय तथा अन्तराष्ट्रिय स्तरमा स्थापित गर्न महत्वपूर्ण योगदान पुगेको छ ।’

नेपाली सेना स्वास्थ्य विज्ञान संस्थान, चिकित्साशास्त्र महाविद्यालयका प्राचार्य सहायक रथी प्रा डा रत्ना अधिकारीले त्रिविवि चिकित्सा अध्ययन संस्थानको नीति भित्र रहेर सस्थानले पठनपाठन तथा अध्ययन अनुसन्धान गरिराखेको बताउनुभयो ।

–रासस