कमजोर अवस्थाका विद्यार्थीलाई छात्रावास बन्दै

मुस्ताङ/  बारागुङ मुक्तिक्षेत्र–३ छुसाङस्थित प्रस्तावित जननर्मल माध्यमिक विद्यालयको छात्रावास भवन निर्माणाधीन अवस्थामा छ । गण्डकी प्रदेश सरकारअन्तर्गत सामाजिक विकास, युवा तथा खेलकुद मन्त्रालयको अनुदान सहयोगमा आर्थिक अवस्था कमजोर भएका बालबालिका पढ्ने विद्यालयको छात्राबास भवन निर्माण सुरु गरिएको थियो ।

आर्थिक अवस्था कमजोर भएका तथा कठिन परिस्थितिका बालबालिकाका लागि शैक्षिक पठनपाठन तथा आवासीय सेवा सहज गराउने उद्देश्यले प्रदेश सरकारले बर्सेनि विद्यालयको आवासीय छात्रावास भवन निर्माणमा आवश्यक बजेट विनियोजन गर्दै आइरहेको छ ।

गण्डकी प्रदेश सरकारले यहाँको जननर्मल माध्यमिक विद्यालयलाई हिमाली तथा दुर्गम क्षेत्र नमुना विद्यालयका रुपमा २०७६ सालमा सूचीकृत गरेको थियो ।

नमुना विद्यालयका रुपमा सूचीकृत भएसँगै प्रदेश सरकारले दोस्रो वर्षदेखि विद्यालयको छात्रावास भवन बनाउन योजना अघि बढाएको थियो । कोभिड माहामारीका कारण विद्यालयको छात्राबास भवनको भौतिक निर्माण प्रभावित बनेको थियो ।

भवन निर्माणका लागि प्रदेश सरकारअन्तर्गत आव २०८०/०८१ देखि क्रमागत रूपमा बजेट विनियोजन भइरहेको एकीकृत सेवा कार्यालय मुस्ताङका प्रमुख निरपति दर्जीले जानकारी दिनुभयो ।

विद्यालयको चारतले भवनको लागत अनुमान आठ करोड रुपैयाँ रहेको भए पनि प्रदेश सरकारबाट बर्सेनि न्यून बजेट विनियोजन हुँदा भवन निर्माण सम्पन्न हुन ढिलाइ भएको उहाँको भनाइ छ । 

हिमाली तथा दुर्गम क्षेत्र नमुना विद्यालयको आवासीय छात्रावास भवन तथा पूर्वाधार निर्माणका लागि चालु आवमा प्रदेश सरकारबाट ४५ लाख सात हजार रुपैयाँ बजेट विनियोजन भएको कार्यालय प्रमुख दर्जीले बताउनुभयो ।

छात्रावास तथा पूर्वाधार निर्माणका लागि अघिल्लो दुई आवमा एक करोड रुपैयाँ विनियोजन भएकामा उक्त बजेटबाट छात्रवासको दोस्रो तलाको भौतिक संरचना निर्माण भएको उहाँले उल्लेख गर्नुभयो ।

प्रदेश सरकारबाट ‘हाम्रो विद्यालय नमुना विद्यालय’ का रूपमा सूचीकृत भई पूर्वाधार निर्माणका योजना अघि बढाइएको भए पनि ठूलो आकारको बजेट विनियोजन हुन नसक्दा छात्रावास भवन निर्माणलाई पूर्णता दिन ढिलाइ भएको विद्यालयका प्रधानाध्यापक श्याम गुरुङले जानकारी दिनुभयो ।

‘यहाँ मुस्ताङसहित विभिन्न जिल्लाका एक सय २३ जना विद्यार्थी अध्ययनरत छन् । भवन नहुँदा आवासीय सुविधा उपलब्ध गराउन असहज भइरहेको छ’, प्रधानाध्यापक गुरुङले भन्नुभयो, ‘विद्यालयको पुरानै जीर्ण भवनमा छात्रलाई राखेका छौँ भने छात्राका लागि बनिरहेको भुइँतलामा व्यवस्थापन गरेका छौँ ।’

यहाँको कठिन परिस्थिति तथा आर्थिक अभाव भएका बालबालिका पढ्दै गरेको जननर्मल माध्यामिक विद्यालयका २७ जना विद्यार्थीलाई चालु आर्थिक वर्षमा १० लाख रुपैयाँ बजेट आवासीय अनुदान प्राप्त हुने प्राधानाध्यापक गुरुङले बताउनुभयो ।

यसैगरी, सङ्घीय सरकारबाट हिमाली आवासीय अनुदानस्वरुप १० महिनाका लागि प्रतिविद्यार्थी मासिक पाँच हजार रुपैयाँ अनुदान सहयोग रहेको उहाँले जानकारी दिनुभयो ।

–रासस