समर्थन मूल्यभन्दा बढीमा बिकिरहेछ गहुँ

कैलाली/  कैलालीका किसान सरकारले तोकेको समर्थन मूल्यभन्दा बढीमा गहुँ बिक्री गर्न पाउँदा खुसी भएका छन् ।

खाद्य व्यवस्था तथा व्यापार कम्पनी लिमिटेड प्रादेशिक कार्यालय धनगढीले बुधबारदेखि टीकापुरबाट किसान तथा कृषिसम्बन्धी सहकारीबाट गहुँ खरिद सुरु गरेको हो । यसअघि मङ्गलबारदेखि धनगढीको मोहनपुरबाट पनि गहुँ खरिद सुरु गरिएको थियो ।

सरकारले निर्धारण गरेको न्यूनतम समर्थन मूल्यभन्दा बढी मूल्यमा गहुँ खरिद सुरु गरिएको प्रादेशिक कार्यालय धनगढीका वरिष्ठ सहायक पुष्पराज बजगाईंले जानकारी दिनुभयो ।

‘सरकारले निर्धारण गरेको गहुँको न्यूनतम समर्थन मूल्य प्रति क्विन्टल तीन हजार नौ सय ४५ रुपैयाँ रहेको छ । खाद्य कम्पनीले किसानलाई प्रोत्साहन गर्ने उद्देश्यले प्रति क्विन्टल चार हजार दुई सय ५० रुपैयाँमा गहुँ खरिद गर्न लागेको छ’, उहाँले भन्नुभयो, ‘बढी मूल्य पाएपछि किसान खुसी भएका छन् ।’

यसरी समर्थन मूल्यभन्दा बढी रुपैयाँमा गहुँ बेच्न पाएकामा किसान खुसी भएका छन् । गहुँ बेच्न खाद्य गोदाम टीकापुर पुग्नुभएका योगेन्द्र साउदले अन्य ठाउँभन्दा खाद्यमा गहुँ बेच्दा मूल्य बढी पाएको बताउनुभयो । ‘केही किसानले सस्तोमा यसअघि नै गहुँ बेचिसकेका छन्’, उहाँले भन्नुभयो, ‘हामीले भने राम्रो मूल्य पायौँ ।’

जोशीपुर गाउँपालिका–६ महादेवाका क्रिमलाल डगौरा पनि खाद्यमा गहुँ बेच्न पाउँदा खुसी हुनुहुन्छ । ‘तोकेकोभन्दा बढी मूल्य पाइयो’, उहाँ भन्नुहुन्छ, ‘सरकारले समयमै मूल्य तोक्ने र खरिद कार्य पनि समयमै गर्नुपर्छ ।’

गाउँका केही किसानले गहुँ बिक्री गरिसकेकाले आउँदा दिनमा समयमै खरिद कार्य सुरु गर्न सुझाव दिएका छन् । अर्का किसान रमेश चौधरी खेतको उत्पादनले नै बालबालिकालाई कापीकिताब जोहो गर्नुपर्ने भएकाले खेतबाटै गहुँ बिक्री गरिसकेको बताउनुहुन्छ ।

यहाँका किसान खेतबारीको उत्पादन बेचेर घरखर्च, बर्खे खेतीका लागि बीउ र मल जोहो गर्छन् । सरकारले आउँदा दिनमा हरेक कार्य किसानलाई राहत हुनेगरी गर्नुपर्ने उहाँको भनाइ छ ।

खाद्य कम्पनीले कैलालीबाट १० हजार क्विन्टल गहुँ खरिद गर्ने लक्ष्य राखेको छ । प्रतिकिसानबाट बढीमा ७० क्विन्टल र कृषिसम्बन्धी सहकारीबाट प्रतिसहकारी बढीमा पाँच सय क्विन्टलसम्म गहुँ खरिद गर्ने योजना खाद्य कम्पनीको छ ।

यसका साथै यस क्षेत्रका बीज वृद्धिको काम गर्ने सहकारीले समर्थन मूल्यभन्दा बढीमा किसानको गहुँ खरिद गर्ने गरेका छन् । तोकेकोभन्दा बढी मूल्य पाउँदा किसानलाई कृषिकर्म गर्न हौसला मिलेको छ ।

–रासस