कृषिले बढाएको रोजगारी

दाङ/  घोराही उपमहानगरपालिका–२ निमुरियाका मुना चौधरी स्थानीयस्तरमा सञ्चालनमा रहेको कृषि फार्ममा रोजगार पाउँदा खुसी हुनुहुन्छ । गाउँमै रोजगार पाएकैले अन्यत्र काम खोज्नु जान नपरेको उहाँ बताउनुहुन्छ ।

छोराछोरीको पढाईदेखि घर खर्च टार्न पनि सहज भएको उहाँको अनुभव छ । कृषि फार्ममा काम पाएपछि पहिलाजस्तो खाली बस्नुपर्ने अवस्था नभएको उहाँले बताउनुभयो ।

उहाँले भन्नुभयो, ‘पहिले हिउँदमा काम नहुँदा घरमै बस्नुपर्दथ्यो । तर, यहाँ कृषि फार्म खुलेपछि गाउँघरमै काम पाइनुका साथै आम्दानी पनि भइरहेको छ ।’ हाल मासिक  झण्डै १५ हजार रुपैयाँ कमाउने गरेको उहाँको भनाइ छ ।
उहाँजस्तै सोही स्थानका अर्का स्थानीय देवा चौधरी पनि गाउँघरमै रोजगारी प्राप्त गर्दा जीविका चलाउन सजिलो भएको बताउनुहुन्छ ।

उहाँले भन्नुभयो, ‘घरमा पाँच जनाको परिवार छ । श्रीमान् घर बनाउने काम गर्नुहुन्छ । मैले कृषि फार्ममा काम गर्दै आएको छु । आम्दानी पनि राम्रै भइरहेको छ । जसले गर्दा आफ्नो कमाइले घरखर्च चल्ने र श्रीमानको कमाइ भने बचत गर्दै आएका छौँ ।’

पछिल्लो समय गाउँघरमै रोजगारी प्राप्त भएपछि उहाँजस्तै धेरै कृषि क्षेत्रमा जोडिन थालेका छन् । घोराही उपमहानगरपालिका–२ निमुरियाका हरि जिसीले व्यावसायिक कृषि सञ्चालन गरी स्थानीयलाई रोजगारी दिलाइ रहनुभएको छ । उमेरले ३७ वर्ष पुग्नुभएका जिसीले सुवर्ण कृषि फार्ममार्फत कृषि व्यवसाय गर्दै आउनुभएको छ ।

जग्गा भाडामा लिएर खेती गरी जिसी स्वरोजगार त बन्नुभएको छ नै अरु ४० जना स्थानीयलाई रोजगारीसमेत दिनुभएको छ । जिसीले सात वर्ष अघिदेखि सञ्चालन गर्दै आउनुभएको फार्ममा तरकारी लगाउने, गोडमेल गर्ने, टिप्नेलगायतका काम पाइने भएपछि स्थानीयलाई पहिलेजस्तो खाली बस्नुपर्ने अवस्था छैन । विद्यार्थीसमेत कलेज पढ्दै कमाउँदै गर्न पाएका छन् ।

सात वर्षअघि सात कट्ठा जग्गाबाट सुरु गर्नुभएको जिसीको तरकारीखेती अहिले १४ बिघामा फैलिएको छ । आफ्नो एक बिघा र बाँकी जग्गा भाडामा लिएर उहाँले व्यावसायिक तरकारीखेती गर्दै आउनुभएको छ । वार्षिक दुई करोड रुपैयाँको कारोबार गर्ने जिसी कामदारको ज्यालामा मात्रै झन्डै एक करोड रुपैयाँ वार्षिक खर्च गर्नुहुन्छ ।

जिसीले कृषि फार्ममार्फत सिजनअनुसार टमाटर, बोडी, काँक्रा, गोभीलगायतका तरकारी उत्पादन गर्नुहुन्छ । उत्पादन भएको तरकारी बिक्रीका लागि घोराही बजारमा पसल पनि सञ्चालन गर्नुभएको छ ।

सानैदेखि तरकारीखेतीप्रति भएको रुचिका कारण व्यवसायिक तरकारीखेतीमा लागेको बताउने जिसीले भन्नुभयो, ‘तरकारीखेतीबाट आम्दानी राम्रै छ । उत्पादन भएको तरकारी बिक्रीका लागि बजारमा पसल पनि राखेको छु । जसले गर्दा पसल र फार्म दुवैतिर रोजगारी मिलेको छ ।’

उहाँले आजभोलि काँक्रा फार्मबाटै १७ रुपैयाँ र टमाटर २८ रुपैयाँ प्रतिकिलोको दरले बिक्री गर्दै आउनुभएको छ । उहाँले उत्पादन गर्नुभएको तरकारी दाङ जिल्लासहित जिल्ला बाहिर बुटवल, कोहलपुर नेपालगन्ज, धनगढी, पोखरा, काठमाडौँसम्म बिक्रीका लागि लैजाने गरिएको छ ।

–रासस