साउन लागेसँगै चुरापोतेको व्यापार बढ्यो

आफ्नै खबर

२ साउन २०८१ बुधबार (१२ महिना अघि)

पाठक संख्या १३४

महोत्तरी/  साउन लागेपछि यहाँका महिलाले हरियो चुरा र पोते लगाउने परम्पराले चुरापोतेको व्यापार बढेको छ । जिल्लामा साउन लागेदेखि ७ लाख रुपैयाँको चुरापोतेको व्यापार भएको यहाँस्थित उद्योग वाणिज्य सङ्घले जनाएको छ ।

जलेश्वर, मटिहानी, बर्दिबास, गौशाला, औरही, बलवा, मनरा, पिपरा, भ्रमरपुरालगायत बजार क्षेत्रबाट २ दिनमा ७ लाख रुपैयाँको चुराको व्यापार भएको उद्योग वाणिज्य सङ्घका महासचिव शिवचन्द्र चौधरीले जानकारी दिनुभयो । यसअघिका वर्षमा पनि साउनमा मात्रै ३० लाख रुपैयाँभन्दा बढीको चुरापोतेको व्यापार हुने गरेको उहाँको भनाई छ । 

सदरमुकाम जलेश्वरमा लाग्ने गरको चुरापोते बजार, शृङ्गार पसल तथा लहेरी (चुरा बेच्ने) महिलाले गाउँगाउँ गएर बेच्ने स्थानमा चुरापोते किन्ने महिला, किशोरी, युवतीहरुको घुइँचो लाग्ने गरेको जलेश्वर–२ का शृङ्गारको व्यापारी राम महतोले बताउनुभयो । जिल्लाका अधिकांश हाटबजारमा हरियो, पहेँलो, रातो चुरा तथा पोते किन्ने महिलाको घुइँचो लाग्ने गरेको उहाँको भनाई छ । 

विवाहित महिलाले अनिवार्य रुपमा हरियो चुरा र पोते लगाउने परम्पराले गर्दा साउनमा अन्य समयको तुलनामा बढी व्यापार हुने गरेको जलेश्वर–२ का शृङ्गार व्यापारी मुस्ताक अन्सारीले बताउनुभयो । वाणिज्य सङ्घका महासचिव चौधरीले भन्नुभयो, ‘जिल्लामा यसअघिका साउनमा चुरापोतेको व्यापारबाट ३० लाख रुपैयाँसम्म आम्दानी हुन्थ्यो । यस वर्ष २ दिनको व्यापारको अवस्थाले आम्दानी बढी हुने अनुमान गरेका छौँ ।’ 

जलेश्वर बजारमा दैनिक चुरा बेच्दै आउनुभएकी मुस्ताक लहेरीले दुई दिनमा १० हजार रुपैयाँभन्दा बढी आम्दानी भएको बताउनुभयो । गत वर्ष महिनाभरि १ लाख रुपैयाँ आम्दानी भएको जनाउँदै यो वर्षको साउनमा तुलनात्मक रुपमा बिक्री बढेकाले आम्दानी पनि बढी हुनसक्ने उहाँले उल्लेख गर्नुभयो ।

गौशाला बजारकी बेचनी खातुनले २ दिनमा १५ हजार रुपैयाँ, बलबा बजारकी फुलगेन लहेरी र औरही बजारकी दुखनी खातुनले समान २० हजार रुपैयाँ, मनराकी हरीया लहेरनीले १५ हजार रुपैया्रँको चुरापोते व्यापार भएको बताएका छन् । साउन लागेसँगै जिल्लाका प्रत्येक गाउँ तथा सहरका चुरा पसलमा हरियो चुरा र पोते लगाउने महिलाको घुइँचो लाग्ने गरेको छ ।

-रासस