भारतबाट फर्किएर बाख्रापालन, वार्षिक ६ लाख आम्दानी

आफ्नै खबर

५ फागुन २०८१ सोमबार (३ महिना अघि)

पाठक संख्या १०८

बैतडी/  सिगास गाउँपालिका–९ जालहाल्लाका ४१ वर्षीय दीपक चन्दका साथीहरु रोजगारीको खोजीमा भारततिर छन् । गाउँका अधिकांश युवा तेस्रो मुलुक छन् । 

दीपक भने गाउँमै बाख्रापालन व्यवसायमा हुनुहुन्छ । उहाँलाई बाख्रापालन व्यवसायले घरायसीसहित छोराछोरीको पढाइ खर्च व्यवस्थापन गर्न कुनै समस्या छैन । 

‘मलाई पनि बाहिर जाने सोच नआएको भने होइन, तर गाउँमै केही गर्नुपर्छ भन्ने लागेर व्यावसायिक रुपमा बाख्रा पाल्न थाले’, उहाँले भन्नुभयो, ‘मेहनतअनुसारको आम्दानी पनि राम्रै भइरहेको छ ।’ 

विगत ६ वर्षदेखि व्यावसायिक बाख्रापालन गरीरहेका दीपकको फार्ममा अहिले स्थानीय र बोयर क्रस जातका गरि ७० बढी बाख्रा छन् । तिमध्ये ४७ माउ, आठ खसी र बाँकी पाठापाठी छन् । उनीहरुका लागि व्यवस्थित खोर पनि निर्माण गरिएका छन् ।

‘चार वर्ष रोजगारीका लागि भारत गएँ । सेक्युरेटी गार्डको काम थियो । तलब तीन हजार पाँच सय भारु मात्रै थियो । त्यहाँ श्रमको उचित मूल्याङ्कन नभएको महसुस हुन्थ्यो, अहिले गाउँमै बाख्रा फार्म दर्ता गरेर व्यावसायिक रुपमा अघि बढेँ’, उहाँले भन्नुभयो, ‘अहिले वार्षिक ६ लाख रुपैयाँसम्म आम्दानी हुन्छ ।’

बाख्रापालन व्यवसाय पहिले पनि गर्दै आएको भए पनि २०७५ मा उदयदेव कृषि तथा पशुपन्छी फार्म दर्ता गरेर व्यावसायिक रुपमा अघि बढेको उहाँले जानकारी दिनुभयो । 

‘दुई हप्ताअघि मात्रै खसी र माउ गरी ४० वटा जति बिक्री गर्यौँ, ग्राहक खोज्न पनि कुनै समस्या छैन, अधिकांश व्यवसायी घरसम्मै खरिद गर्न आइपुग्छन्, उहाँकी श्रीमती नरेन्द्रा चन्दले भन्नुभयो, ‘चरनको समेत त्यस्तो समस्या छैन, व्यवसायबाट सन्तुष्ट छौँ ।’

भेटेरिनरी अस्पताल तथा पशुसेवा विज्ञ केन्द्र पाटनबाट बाख्रामा लाग्ने पिपिआर रोग नियन्त्रणका लागि खोप तथा व्यवसाय प्रवर्द्धनका लागि आवश्यक प्राविधिक सहयोग प्राप्त हुँदै आएको चन्द दम्पतीको भनाइ छ । उहाँहरुले बाख्रापालन व्यवासयबाट राम्रो आम्दानी गर्न थालेपछि गाउँका अन्य व्यक्ति पनि यस पेसातर्फ आकर्षित हुन थालेका छन् । 

सोही ठाउँका स्थानीय कृष्ण चन्द पनि दीपकसँग आवश्यक सहयोग लिएर बाख्रा पालन व्यवसायमा लाग्नुभएको छ । आम्दानीको राम्रो सम्भावना भएकाले २०७८ सालदेखि व्यावसायिक रुपमै बाख्रा पाल्न थालेको उहाँले बताउनुभयो । 

‘खोर निर्माण गर्दा झन्डै चार लाख रुपैयाँ जति खर्च लाग्यो । स्थानीय र बोयर गरी ४० बाख्रा छन् । आम्दानी पनि ठिकठिकै छ’, उहाँले भन्नुभयो, ‘घरायसी खर्चको व्यवस्थापन यसैबाट भइरहेको छ ।’

बाख्रामा देखिने अज्ञात रोगले भने सताउने गरेको उहाँले बताउनुभयो । कृष्णले भन्नुभयो, ‘गत वर्ष मात्रै २० बाख्रा बिरामी परेर मरे, केही घाटा बेहोर्नु पर्याे, चुनौती यही छ ।’

यो आर्थिक वर्षमा बाख्रापालन व्यवसाय गरिरहेका किसानका लागि बाख्रा मोडेल फार्म कार्यक्रम कार्यान्वयनको चरणमा रहेको भेटेरिनरी अस्पताल तथा पशुसेवाविज्ञ केन्द्रका प्रमुख गुमानी पन्तले जानकारी दिनुभयो । उक्त कार्यक्रमका लागि आवेदन माग गरेको तथा छनोटको प्रक्रियामा रहेको उहाँले बताउनुभयो ।

–रासस